Tojikistonning Xoʻjand shahrida kuchli shamol tufayli havo shari nazoratdan chiqib ketib, bir nechta uy tomiga quladi. Bu haqda “AsiaPlus” xabar berdi.

Hodisa 1-iyun kuni kechqurun Kamoli Xoʻjandiy nomidagi teatr yaqinida sodir boʻlgan. Xalqaro bolalarni himoya qilish kuni munosabati bilan tashkil etilgan tadbir uchun olib kelingan havo shari yetarlicha mustahkamlanmagani sababli kuchli shamol taʼsirida uchib ketgan.

Xoʻjand shahar 1-sonli shifoxonasi maʼlumotiga koʻra, voqeadan keyin uch kishi tibbiy muassasaga olib kelingan. Ulardan biri — Oʻzbekiston fuqarosi, 46 yoshli R.S. boʻlib, hodisa vaqtida havo shari ichida boʻlgan. Arqon uzilganidan soʻng u yerga qulab tushgan.

Shuningdek, Xoʻjand shahrida yashovchi 40 yoshli F.T. ham uzilgan arqon taʼsirida jarohat olgan. Uning voqea joyida boʻlgan taxminan 10–11 yoshli qiziga ham yengil tan jarohati yetgan.

Havo shari qulashi natijasida Aminjon Rasulov koʻchasidagi ikki uyning tom qismiga zarar yetgan. Uy egalarining aytishicha, sharni uchirgan kompaniya mutaxassislarni jalb qilib, yetkazilgan zararni bartaraf etgan. Hodisa videosi esa ijtimoiy tarmoqlarda keng muhokamalarga sabab boʻlmoqda.