Ijtimoiy tarmoqlarda Toshkent shahrida “Damas” rusumli avtomobil haydovchisi maktab oʻquvchisini urib yuborib, voqea joyidan qochib ketgani aks etgan video tarqaldi. Poytaxt IIBB Yoʻl harakati xavfsizligi boshqarmasi axborot xizmati ushbu hodisa yuzasidan maʼlumot berdi.

Aniqlanishicha, voqea joriy yilning 20-aprel kuni Toshkent shahri Olmazor tumanidagi Keles yoʻli koʻchasida yuz bergan. Shahar IIBB xodimlari tomonidan olib borilgan surishtiruvlar davomida mazkur yoʻl-transport hodisasini 19 yoshli yigit sodir etgani maʼlum boʻlgan.

Haydovchining soʻzlariga koʻra, u bolani urib yuborgandan soʻng sarosimaga tushib, shok holatida harakatni davom ettirgan. Keyinroq toʻxtab oʻziga kelgan va qaytishga qaror qilgan, biroq bu vaqtda jabrlanuvchini tez yordam mashinasi olib ketgan boʻlgan. Shundan soʻng uning oʻzi huquq-tartibot organlariga voqea haqida xabar bergan.

Qayd etilishicha, hozirda ushbu holat yuzasidan Maʼmuriy javobgarlik toʻgʻrisidagi kodeksining 133-moddasi (transport vositalari haydovchilarining yoʻl harakati qoidalarini buzishi jabrlanuvchiga yengil tan jarohati yoki ancha miqdorda moddiy zarar yetkazilishiga olib kelishi) va 137-moddasi (yoʻl-transport hodisasi yuz bergan joydan ketib qolish) boʻyicha bayonnomalar rasmiylashtirilgan.