Soliq qoʻmitasi, “Oʻzbekneftgaz” va ayrim xususiy korxonalar masʼullari ishtirokidagi 643 mlrd soʻmlik talon-toroj fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Qayd etilishicha, Departament tomonidan Soliq qoʻmitasi komplayens va korrupsiyaga qarshi nazorat boshqarmasi bilan hamkorlikda oʻtkazilgan tergovga qadar tekshiruvda aniqlanishicha, Soliq qoʻmitasi, Buxoro viloyati soliq boshqarmasi, “Oʻzbekneftgaz” AJ, “Sh.G.” MCHJ, “S.E.” MCHJ QK, “A.” MCHJ va “E.E.” MCHJ QKning Oʻzbekistondagi doimiy muassasasi masʼul shaxslari oʻzaro til biriktirgan.

Shoʻrtan gaz-kimyo majmuasining ishlab chiqarish quvvatini kengaytirish boʻyicha berilgan 5,3 trln soʻmlik xizmatlar QQSdan ozod etilgan boʻlsa-da, QQS summasini elektron hisob-fakturalarga noqonuniy kiritib, byudjetda asossiz ravishda QQS mablagʻini hosil qilib, ushbu mablagʻni “A.” MCHJning hisob raqamiga qaytarilishiga va “S.E.” MCHJ QKning davlat oldidagi kreditorlik qarzdorliklarining yoʻq qilinishiga erishgan.

Buning oqibatida 643,2 mlrd soʻmlik byudjet mablagʻlari oʻzlashtirish va rastrata qilish yoʻli bilan talon-toroj qilingan.

Mazkur holat yuzasidan Jinoyat kodeksining 167-moddasi (oʻzlashtirish yoki rastrata yoʻli bilan talon-toroj qilish) bilan jinoyat ishi qoʻzgʻatilib, tergov harakatlari oʻtkazilmoqda.