Oliy Majlis Qonunchilik palatasi Korrupsiyaga qarshi kurashish va sud-huquq masalalari qoʻmitasining yigʻilishida Adliya vazirligi rahbariyatining 2025-yil uchun belgilangan samaradorlik koʻrsatkichlarining (KPI) bajarilish holati yuzasidan axboroti eshitildi.

Taʼkidlanganidek, Prezidentimizning “Respublika va mahalliy ijro etuvchi hokimiyat organlari hamda xoʻjalik birlashmalari faoliyati samaradorligini baholash tizimini takomillashtirish chora-tadbirlari toʻgʻrisida”gi Farmonida Oliy Majlis Qonunchilik palatasiga respublika ijro etuvchi hokimiyat organlari va xoʻjalik birlashmalari rahbarlari hamda oʻrinbosarlarining samaradorlik koʻrsatkichlari bajarilishi yuzasidan hisobotlarini eshitib borish tavsiya etilgan.

Mazkur Farmon bilan respublika va mahalliy ijro etuvchi hokimiyat organlari rahbarlari faoliyatini aniq mezonlar asosida baholash tizimi joriy etilgan boʻlib, bu davlat boshqaruvida natijadorlik, ochiqlik va shaxsiy masʼuliyatni kuchaytirishga xizmat qilayotganligi alohida qayd etib oʻtildi.

Majlisda yuqorida koʻrsatilgan vazifalarning ijrosini taʼminlash maqsadida Adliya vazirligi rahbariyati tomonidan samaradorlik koʻrsatkichlarining har bir sohalar kesimida bajarilishi yuzasidan deputatlarga batafsil axborot berildi.

Jumladan, normativ-huquqiy hujjatlarni maqbullashtirish va ularning sonini qisqartirish, tartibga solish taʼsirini baholash tizimini keng joriy etish, korrupsiyaga qarshi ekspertiza hajmini oshirish, davlat xizmatlarini soddalashtirish va raqamlashtirish, advokatura, sud-ekspertiza hamda intellektual mulk sohalarini rivojlantirish, “ijro.gov.uz” tizimi orqali ijro intizomini taʼminlash; arxiv hujjatlarini raqamlashtirish kabi yoʻnalishlarda amalga oshirilgan ishlar haqida axborot berildi.

Maʼlumotlarga koʻra, 2025-yil uchun vazir va uning oʻrinbosarlari uchun belgilangan samaradorlik koʻrsatkichlari toʻliq bajarilgan. Davlat xizmatlarini soddalashtirish, litsenziyalash va ruxsat berish tartib-taomillarini qisqartirish, intellektual mulk obyektlarini roʻyxatdan oʻtkazish hajmini oshirish hamda huquqiy targʻibotni kuchaytirish borasida sezilarli natijalarga erishilgan.

Qoʻmita aʼzolari tomonidan koʻrsatkichlarning nafaqat belgilangan miqdorlariga erishilishi, balki ularning sifatli bajarilishi holati atroflicha muhokama qilindi. Xususan, amalga oshirilgan ishlarning aholi va tadbirkorlik subyektlari uchun yaratilgan qulayliklarga, huquqiy muhitning yaxshilanishiga, byurokratik toʻsiqlarning kamayishiga taʼsiri yuzasidan savollar koʻtarildi. Masʼullar tomonidan atroflicha javoblar berildi.

Eshituv davomida erishilgan natijalar bilan birga yechimini kutayotgan ayrim masalalar borligi taʼkidlanib, ularni bartaraf qilish, tizimni yanada takomillashtirish boʻyicha takliflar berildi.

Yakunda qoʻmitaning tegishli qarori qabul qilindi.