26:T780,

Ijtimoiy tarmoqlarda mehnat taʼtilida boʻlgan ayrim pedagoglarning turli tadbirlarga jalb etilayotgani toʻgʻrisida xabarlar tarqaldi. Mazkur holat yuzasidan Davlat mehnat inspeksiyasi munosabat bildirdi.

Maʼlum qilinishicha, mehnat taʼtilida boʻlgan pedagoglarni ularning roziligisiz ishga chaqirish, xizmat topshiriqlari berish yoki turli tadbirlarga jalb etish mehnat qonunchiligi talablariga zid hisoblanadi.

Amaldagi qonunchilikka koʻra, har yilgi mehnat taʼtili xodimning dam olishi va mehnat qobiliyatini tiklashi uchun beriladigan davr hisoblanadi. Taʼtil vaqtida xodimning ish oʻrni (lavozimi) va oʻrtacha ish haqi saqlanib qoladi hamda u mehnat vazifalarini bajarishdan ozod etiladi.

Shu munosabat bilan inspeksiya pedagog xodimlarni ularning roziligisiz mehnat taʼtilidan chaqirib olish, taʼtil davrida xizmat topshiriqlari berish yoki turli tadbirlarga jalb etish qonunchilik talablarini buzish ekanini eslatib oʻtgan.

Qayd etilishicha, mansabdor shaxslar tomonidan mehnat qonunchiligi talablarining buzilishi uchun maʼmuriy javobgarlik belgilangan. Shuningdek, xodimlarni turli tadbirlarda qatnashishga majburlash, ularga bosim oʻtkazish yoki tahdid qilish holatlari majburiy mehnat sifatida baholanishi va qonunda nazarda tutilgan javobgarlikka sabab boʻlishi mumkin.

Pedagoglar oʻz huquqlari buzilgan holatlarda Kambagʻallikni qisqartirish va bandlik vazirligining 1176 qisqa raqami, (71) 200-06-00 ishonch telefoni yoki Davlat mehnat inspeksiyasining rasmiy Telegram boti orqali murojaat qilishlari mumkinligi bildirilgan.