Davlat va jamoat arbobi, mehnat faxriysi Rim Abdulovich Giniyatullin shu yilning 19-aprel kuni 83 yoshida vafot etdi.

Rim Giniyatullin 1943-yil 18-sentyabrda Jizzax viloyatining Zomin tumanida tugʻildi. 1963-yilda Toshkent irrigatsiya va qishloq xoʻjaligini mexanizatsiyalash institutini (hozirgi “Toshkent irrigatsiya va qishloq xoʻjaligini mexanizatsiyalash muhandislari instituti” milliy tadqiqot universiteti) muhandis-gidrotexnik yoʻnalishi boʻyicha tugatdi. Mehnat faoliyatini Oʻzbekiston qurilish vazirligida oddiy ishchi sifatida boshlab, keyinchalik ushbu vazirlikda usta, bosh muhandis vazifalarida xizmat qildi. U Oʻzbekiston suv xoʻjaligi vazirligida boshqarma boshligʻi oʻrinbosari, bosh boshqarma boshligʻi, suv xoʻjaligi vaziri oʻrinbosari, Davlat reja qoʻmitasi raisining oʻrinbosari, Davlat agrosanoat qoʻmitasi raisi oʻrinbosari lavozimlarida ishlab, katta bilim va tajriba orttirdi.

Mohir tashkilotchi rahbar 1989–1996-yillarda melioratsiya va suv xoʻjaligi vaziri, 1996–1997-yillarda Oʻzbekiston Respublikasi Bosh vazirining oʻrinbosari kabi masʼul lavozimlarda fidokorona mehnat qilib, mamlakatimizda suv va qishloq xoʻjaligi tarmoqlarini rivojlantirish orqali yurtimizning ijtimoiy-iqtisodiy taraqqiyotiga munosib hissa qoʻshdi.

R.A.Giniyatullin Orolni qutqarish Xalqaro jamgʻarmasida turli rahbarlik vazifalarida ishlab, dengizning qurishi bilan bogʻliq salbiy oqibatlarni yumshatish boʻyicha amaliy chora-tadbirlarni ishlab chiqishda jonbozlik koʻrsatdi.

Umrining soʻnggi yillarida u Yangi Oʻzbekistonni barpo etish jarayonlarida, xususan, koʻpmillatli jamiyatimizda tinchlik, mehr-oqibat, bagʻrikenglik va hamjihatlik muhitini mustahkamlash, keksalar va nuroniylarni qoʻllab-quvvatlash, yoshlarni Vatanga muhabbat, milliy va umuminsoniy qadriyatlarga hurmat ruhida tarbiyalashda faol ishtirok etdi.

Rim Giniyatullinning mamlakatimizni taraqqiy ettirish borasidagi xizmatlari davlatimiz tomonidan munosib taqdirlandi. U “Oʻzbekiston Respublikasida xizmat koʻrsatgan irrigator”, “Oʻzbekiston Respublikasida xizmat koʻrsatgan yoshlar murabbiysi” faxriy unvonlari, “Mehnat shuhrati” va “Doʻstlik” ordenlari bilan mukofotlandi.

El-yurtimiz oʻrtasida obroʻ-eʼtibor topgan tajribali rahbar, yoshlarning mehribon ustozi, samimiy va kamtarin inson Rim Abdulovich Giniyatullinning xotirasi qalblarimizda hamisha saqlanib qoladi.

Sh.Mirziyoyev, T.Norboyeva, N.Ismoilov,

A.Aripov, S.Turdiyev