Bugungi Yangi Oʻzbekiston taraqqiyotining eng muhim xususiyatlaridan biri — ilm-fanga tayangan rivojlanish modeli qaror topayotganidir. Davlatimiz rahbari tashabbusi bilan oliy taʼlim tizimini modernizatsiya qilish, yoshlarning ilmiy izlanishlarini qoʻllab-quvvatlash, taʼlim, ilm-fan va ishlab chiqarish oʻrtasida mustahkam integratsiyani taʼminlash borasida keng koʻlamli islohotlar amalga oshirilmoqda. Zero, mamlakatning ertangi qudrati tabiiy boyliklar yoki moddiy resurslar bilan emas, avvalo intellektual kapital, bilim va innovatsiyalar bilan belgilanadi.

Ana shu ustuvor maqsadlar amalda oʻz ifodasini topayotgan muhim tadbirlardan biri “Xalq soʻzi” va “Narodnoye slovo” gazetalari tahririyatida tashkil etildi. Bu yerda Toshkent davlat iqtisodiyot universitetining “Marketing” yoʻnalishi magistrantlari tomonidan tayyorlangan magistrlik dissertatsiyalari himoyasi boshlandi.

Mazkur jarayon Toshkent davlat iqtisodiyot universiteti rektorining 2026-yil 12-fevraldagi 41-sonli buyrugʻiga muvofiq tashkil etilgan Yakuniy davlat attestatsiya komissiyasi faoliyati doirasida oʻtkazilmoqda. Himoyalar davomida magistrantlar marketing sohasidagi zamonaviy yondashuvlar, raqamli iqtisodiyot sharoitida bozor munosabatlarining transformatsiyasi, isteʼmolchilar bilan samarali kommunikatsiya mexanizmlari hamda iqtisodiy samaradorlikni oshirishga qaratilgan ilmiy taklif va amaliy yechimlarini taqdim etdi.

Yakuniy davlat attestatsiya komissiyasiga “Xalq soʻzi” va “Narodnoye slovo” gazetalari Bosh muharriri oʻrinbosari, iqtisodiyot fanlari doktori, professor Akrom Xashimov raislik qildi. Komissiya tarkibiga yetakchi olimlar, soha mutaxassislari va oliy taʼlim muassasalari vakillari jalb etilgan boʻlib, tadqiqot ishlarining ilmiy yangiligi, amaliy ahamiyati va iqtisodiyot tarmoqlarini rivojlantirishga qoʻshayotgan hissasi atroflicha baholandi.

Himoya jarayonida Adamboyev Abror Akrom oʻgʻli, Mirzayeva Mohinur Gʻulom qizi, Abduvohidova Diyora Shavkat qizi, Xojiyeva Maryam Atabak qizi, Ermuratova Kamila Misir qizi hamda Yulchiyeva Madinabonu Otabek qizi oʻz magistrlik dissertatsiyalari boʻyicha taqdimot qildi.

Tadqiqotlarda raqamli iqtisodiyot sharoitida marketing strategiyalarini takomillashtirish, isteʼmolchilar ehtiyojlarini chuqur oʻrganish, bozor mexanizmlarini samarali boshqarish, milliy iqtisodiyot raqobatbardoshligini oshirish va innovatsion yondashuvlarni keng joriy etish kabi dolzarb masalalar qamrab olingani bilan ahamiyatli boʻldi.

Taʼkidlanganidek, dissertatsiya himoyalarining bevosita amaliyot muassasalarida tashkil etilishi taʼlim va iqtisodiyotning real sektori oʻrtasidagi hamkorlikni mustahkamlash, ilmiy natijalarning hayotga tatbiq etilishini tezlashtirish hamda yosh kadrlarning kasbiy tayyorgarligini yanada oshirishga xizmat qilmoqda. Bu esa oʻz navbatida mamlakat iqtisodiyoti uchun zamonaviy bilim va yuqori malakaga ega mutaxassislar zaxirasini shakllantirishning muhim omili hisoblanadi.

Bugun mamlakatimizda amalga oshirilayotgan keng qamrovli islohotlar markazida inson qadri, bilim va intellektual salohiyat turibdi. “Xalq soʻzi” va “Narodnoye slovo” tahririyatida oʻtgan mazkur himoya jarayoni ham ana shu ezgu gʻoyalarning amaliy ifodasidir. Zero, iqtisodiyotni modernizatsiya qilish, innovatsion taraqqiyotni taʼminlash va milliy raqobatbardoshlikni yuksaltirish yoʻlida ilm-fanga tayangan, zamonaviy dunyoqarashga ega yosh kadrlar hal qiluvchi kuch hisoblanadi. Shu maʼnoda mazkur tadbir nafaqat navbatdagi akademik jarayon, balki Yangi Oʻzbekistonning intellektual kelajagini yaratayotgan yosh avlod salohiyati namoyishi sifatida ham alohida ahamiyatga ega.