Toshkent shahridagi Oʻzbekiston xalqaro anjumanlar saroyida 8-mart — Xalqaro xotin-qizlar kuni munosabati bilan Zulfiya nomidagi Davlat mukofoti sovrindorlari bilan manfaatdor vazirlik va idoralar rahbarlarining uchrashuv tadbiri boʻlib oʻtdi. Unda, Madaniyat vazirligi vakillari ham ishtirok etishdi.

Tadbirda mamlakatimizda iqtidorli yosh xotin-qizlarni qoʻllab-quvvatlash, ularning salohiyatini roʻyobga chiqarish, ilm-fan, taʼlim, madaniyat, sport va boshqa sohalardagi yutuqlarini eʼtirof etish masalalariga alohida eʼtibor qaratildi.

Maʼlumki, Oʻzbekiston Respublikasi Prezidentining 1999-yil 10-iyunda qabul qilingan PF–2326-son Farmoniga muvofiq taʼsis etilgan Zulfiya nomidagi Davlat mukofoti ijtimoiy faolligi, iqtidori va tashabbuskorligi bilan tengdoshlariga oʻrnak boʻlib kelayotgan 14 yoshga toʻlgan va 30 yoshdan oshmagan iqtidorli xotin-qizlarni ragʻbatlantirish maqsadida topshirib kelinmoqda.

Qayd etilganidek, 2000–2025-yillar davomida yurtimizdagi 480 nafar iqtidorli xotin-qiz turli yoʻnalishlardagi bilim va mehnat faoliyatidagi yutuqlari uchun mazkur nufuzli mukofotga sazovor boʻlgan. Yana 28 nafar iqtidorli va tashabbuskor xotin-qiz bugun ushbu safga qoʻshildi.

Uchrashuvni Oʻzbekiston Respublikasi Bosh vaziri oʻrinbosari — Oila va xotin-qizlar qoʻmitasi raisi Zulayho Maxkamova ochib berdi. U oʻz soʻzida Zulfiya nomidagi Davlat mukofoti sovrindorlari mamlakatimiz taraqqiyotida faol ishtirok etayotgan ilgʻor va tashabbuskor yoshlar ekanini alohida taʼkidladi.

Shuningdek, Madaniyat vazirligi vakillari hamda bir qator vazirlik va idoralar vakillari sovrindor qizlarni tabriklab, ularning kelgusidagi faoliyatiga muvaffaqiyat tiladilar hamda esdalik sovgʻalari topshirildi.

Uchrashuv davomida iqtidorli yosh xotin-qizlarni qoʻllab-quvvatlash, ularning bilim va tashabbuslarini amaliyotga joriy etish, davlat va jamiyat taraqqiyotidagi faol ishtirokini yanada kengaytirishga qaratilgan fikr-mulohazalar bildirildi.

Tadbir yosh avlod vakillarini ilm-fan, madaniyat, sport va boshqa sohalarda yanada faol boʻlishga undashi, shuningdek, mamlakatimizda xotin-qizlarga yaratilayotgan imkoniyat va eʼtiborning yana bir ifodasi sifatida ahamiyat kasb etdi.