Ilgari xabar berganimizdek, Oliy Majlis Senati Raisi Tanzila Narbayeva boshchiligidagi delegatsiya Istanbul shahrida boʻldi. Delegatsiya aʼzolari Parlamentlararo ittifoqning 152-assambleyasi doirasida turli mavzudagi debatlar va sessiyalarda ishtirok etdi.

Jumladan, Senatning Fan, taʼlim va sogʻliqni saqlash masalalari qoʻmitasi raisi oʻrinbosari, PI sogʻliqni saqlash qoʻmitasi raisi Oral Ataniyazova “Sogʻliqni saqlashni moliyalashtirishda soliqlar orqali barqarorlikni taʼminlash: parlamentlarning oʻrni” mavzusidagi Parlamentlararo ittifoq va Jahon sogʻliqni saqlash tashkilotining qoʻshma sessiyasida onlayn shaklda ishtirok etdi.

Muhokama davomida sogʻliq uchun zararli mahsulotlarga soliqlarni ishlab chiqish va samarali joriy etishning ahamiyatiga alohida eʼtibor qaratildi. Bunday chora-tadbirlar yuqumli boʻlmagan kasalliklar darajasini pasaytirishga, aholi salomatligi koʻrsatkichlarini yaxshilashga, shuningdek, davlatning byudjet imkoniyatlarini kengaytirishga xizmat qilishi taʼkidlandi.

Senator, shuningdek, Parlamentlararo ittifoqning “Inqiroz sharoitida ayollar, bolalar va oʻsmirlar salomatligi hamda farovonligini taʼminlash, tinchlik va umid yoʻlida parlament harakatlari” mavzusidagi seminarda ishtirok etdi.

Senator oʻz nutqida xalqaro tajriba almashish va sogʻliqni saqlash xizmatlari bilan barchaning qamrab olinishini taʼminlash boʻyicha majburiyatlarning mamlakatlar tomonidan bajarilishini monitoring qilishni kuchaytirish muhimligini taʼkidladi.

Bundan tashqari, senator, ayniqsa inqirozli vaziyatlarda, ayollar, bolalar va oʻsmirlarga yoʻnaltirilgan asosiy tibbiy xizmatlar va tovarlarni moliyalashtirish hamda mazkur yoʻnalishga investitsiyalarni kengaytirish zarurligiga alohida eʼtibor qaratdi.