AQSH Prezidenti Donald Tramp Qoʻshma Shtatlar Qurolli kuchlari Ummon qoʻltigʻida dengiz blokadasini buzib oʻtishga uringan Eron yuk kemasini qoʻlga olganini maʼlum qildi. Bu haqdagi tegishli post Truth Social ijtimoiy tarmogʻida eʼlon qilindi.

“AQSH Harbiy-dengiz kuchlarining “USS Spruance” raketa qiruvchisi Ummon qoʻltigʻida “Touska” kemasini toʻxtatdi va ularga toʻxtash talabi bilan aniq ogohlantirish yubordi. Eron ekipaji boʻysunishdan bosh tortdi, shuning uchun bizning harbiy kemamiz mashina boʻlinmasida teshik ochish orqali ularni toʻxtatdi. Hozirda AQSH dengiz piyodalari ushbu kemani nazorat qilmoqda”, — deb yozdi Amerika yetakchisi.

AQSH Qurolli kuchlari Markaziy qoʻmondonligining bildirishicha, qoʻlga olingan kema Eronning Bandar-Abbos porti tomon harakatlanayotgan boʻlgan.

Taʼkidlanishicha, “Touska” ekipaji olti soat davomida ogohlantirishlarga javob bermagan, shundan soʻng “USS Spruance” kemaning mashina boʻlinmasiga qarata “Mark 45” rusumli 127 millimetrli toʻpdan bir necha bor oʻq uzgan.

Shundan soʻng “Touska” bortiga dengiz piyodalari chiqarilgan.