Oltiariq tumanining Oqboʻyra qishlogʻida yashovchi 87 yoshli taʼlim sohasi faxriysi Aʼzamjon Oripov oilasida 5 oʻgʻil, 4 qizni tarbiyaladi. Oila bekasi Moʻtabar aya oʻzbek ayoli ibo-hayosi, mehnatkashligi timsoli edi. Qariyb 55-yil birga yashab, biror marotaba turmush oʻrtogʻining koʻziga tik qaramadi. Oʻsha davr taqozosiga koʻra, bolalarining chillasi chiqmay dalaga chiqib ketardi. Yilning toʻrt faslida ham mehnatdan bosh koʻtarmasdi. Kutilmagan bir yarim yoshli egizagi Fotima va Zuhra yolgʻiz qolib, sandaldagi choʻgʻda kuyib qoladi. Natijada Zuhraning bir qoʻli barmoqlarini kesib tashlanadi. Yaqinlari uning yashab ketishidan umid uzishgandi, ammo u oʻn kundan keyin koʻzini ochdi. Oʻsha qizaloq bugun 55 yoshga kirdi. Qalbi yarim boʻlsa-da, irodasi butun. Onasidan meros mehnatkashligi tufayli elu yurtda hurmatga sazovor boʻlib kelmoqda. Oqbuyradagi fayzli xonadonlardan birida roʻzgʻor uchun bakor keladigan barcha narsani Zuhra opaning oʻzi yetishtiradi. Tomorqadan yiliga uch-toʻrt marotaba hosil oladi, uzumga qaraydi, qoramol boqadi. Fermer xoʻjaligi aʼzosi sifatida dala yumushlarini ham qoyillatadi. Bir qoʻlida ikki qoʻllilardan koʻp paxta teradi.

– Hamma narsaga oʻz mehnatimiz bilan erishdik, — deydi Zuhra opa. – Bir qoʻlim sogʻlom boʻlmasa-da, mehnatim va uning ortidan topayotgan rohatim bor. Turmush oʻrtogʻim Rahimjon Ahmedov ham II-guruh nogironi. Shunday boʻlishiga qaramay, har doim, har ishda yordam beradi. Hamjihatligimiz tufayli toʻylar qilib, uylar qurdik. Erkatoy nabiramiz Muhammadbilol hech kimdan kam boʻlmay ulgʻayyapti. Kelinim Margʻilon tibbiyot texnikumida oʻqiydi. Toʻlov-kontrakt pulini oilamiz daromadi hisobidan toʻlaymiz.

Turmush oʻrtogʻi Rahimjon aka ham oilada 14 farzandning kenjasi edi. Zuhra opa shunday katta oilaga kelin boʻlib, birgalikda ota-ona duosini olishdi. Bugun xonadon chirogʻini yoqib oʻtirishibdi. Oila bekasi oʻtgan yili davlatimiz mustaqilligining 34-yilligi arafasida Prezidentimiz farmoniga asosan “Jasorat” medali bilan taqdirlandi.

Zuhra opaning tomorqasi – uning boyligi. 12 sotix yerning har bir qarichida peshona terisi, qoʻllarining qadogʻi bor. Ayniqsa, 2 sotixli uzum bogʻi iftixori. Bu bogʻdan har yili oʻrtacha 15 million soʻmgacha daromad oladi. Hovlisida issiqxona ham tashkil etgan. Issiqxonada rediska, bodring yetishtiradi. Qoramol boqish ham uning yana bir sevimli yumushi. Oqboʻyrada Zuhra opani hamma hurmat qiladi. Undan tomorqachilik borasida maslahat soʻrashadi, oʻrnak olishadi. Hatto yaqinlariga ham yaqin maslahatgoʻy, moddiy va maʼnaviy yordamini ayamaydi. Tabiiyki, bu kabi matonatli va mehnatkash insonlarning hayoti yoshlar uchun haqiqiy ibrat maktabidir.

Botir MADIYOROV, “Xalq soʻzi”.