Prezident Shavkat Mirziyoyev raisligida kimyo sanoatini rivojlantirish yuzasidan videoselektor yigʻilishi boshlandi.

Iqtisodiyotimiz jadal rivojlanayotgani, soʻnggi yillarda sanoat tarmoqlarida 3 ming turdagi yangi mahsulotlarni ishlab chiqarish yoʻlga qoʻyilgani taʼkidlandi.

Bundan 9-10-yil ilgari Oʻzbekiston kimyo mahsulotlarining katta qismini mineral oʻgʻit tashkil qilardi.

Oʻtgan davrda sohaga 8 milliard 300 million dollarlik investitsiyalar kirib keldi, 87 ta yirik quvvatlar ishga tushdi.

PVX, “yashil” vodorod, koʻpikli polipropilen, BOPP plyonka kabi 60 dan ziyod turdagi yangi yuqori qoʻshilgan qiymatli mahsulotlar ishlab chiqarish yoʻlga qoʻyildi.

Bu orqali iqtisodiyot tarmoqlarida minglab yangi turdagi mahsulotlar chiqarish uchun zarur xomashyo bazasi yaratildi.

Sohada eksport 3 karra oʻsdi, ishchilar soni 50 mingdan oshdi. Shu bilan birga, toʻqqiz yilda respublika sanoati oʻrtacha 6,3 foizga oʻsgan boʻlsa, kimyoda bu 3 foizga ham yetmayotgani, kimyo mahsulotlari importi oshib, yiliga 4,5 milliard dollarni tashkil qilayotgani koʻrsatib oʻtildi.

Oʻzimizda chiqariladigan kimyoviy mahsulotlar ichki talabning 60 foizini ham qoplamayotgani, mavjud imkoniyatlardan unumli foydalanilmayotgani, kimyo sanoatida bitta ishchiga toʻgʻri keladigan qoʻshilgan qiymat boshqa davlatlardan 2-3 karra kamligi qayd etildi.

“Oʻzkimyosanoat” AJ asosan oʻz tizimidagi yirik korxonalar bilan bandligi, sohada 5 mingdan ortiq korxona bilan tizimli ishlash, ularning muammo va takliflarini eshitish jarayoni sustligi tanqid qilindi.

Shu bois, davlatimiz rahbari bugun kimyo sanoati korxonalari vakillari bilan shaxsan uchrashib, sohadagi masalalarni muhokama qilib olishga qaror qilganini aytdi.