Senatning Agrar, suv xoʻjaligi masalalari va ekologiya qoʻmitasi raisi oʻrinbosari Sayyora Abdikarimova Toshkent toʻqimachilik va yengil sanoat institutida tashkil etilgan “Yashil moda – kelajak nafasi” mavzusidagi koʻrgazmada ishtirok etdi.

Tadbirning asosiy maqsadi ekologik barqarorlikni taʼminlash, moda sanoatida atrof muhitga zarar yetkazmaydigan innovatsion yondashuvlarni keng targʻib qilish hamda yosh dizaynerlarning ijodiy ishlanmalarini qoʻllab-quvvatlashdan iborat.

Koʻrgazmada talabalar va yosh dizaynerlar tomonidan yaratilgan ekologik toza materiallardan tayyorlangan kiyim-kechak kolleksiyalari namoyish etildi. Xususan, qayta ishlangan matolar, tabiiy tolalar va chiqindisiz ishlab chiqarish texnologiyalariga asoslangan dizaynlar mehmonlarda katta qiziqish uygʻotdi.

Tadbirning rasmiy ochilish marosimida senator soʻzga chiqib, bugungi kunda taʼlim muassasalarida ekologik madaniyatni shakllantirish hamda talabalarni barqaror rivojlanish tamoyillari asosida tarbiyalash muhim ahamiyat kasb etayotganini alohida taʼkidladi.

Tadbir doirasida mutaxassislar ishtirokida davra suhbatlari, mahorat darslari va taqdimotlar oʻtkazilib, ularda “yashil moda” konsepsiyasining ahamiyati, global moda sanoatidagi ekologik muammolar hamda ularning yechimlari muhokama qilindi.

Mazkur koʻrgazma nafaqat ijodiy platforma, balki yoshlar ongida ekologik madaniyatni shakllantirishga, tabiatga masʼuliyatli munosabatni targʻib qilishga xizmat qiluvchi muhim tashabbus sifatida eʼtirof etildi.

Tadbir yakunida eng yaxshi dizayn ishlari va innovatsion loyihalar mualliflari maxsus nominatsiyalar boʻyicha taqdirlandi.