Bugun, 21-aprel kuni Chirchiq davlat pedagogika universitetida oʻzbek adabiyoti va jurnalistikasining taniqli vakili, Oʻzbekiston Respublikasida xizmat koʻrsatgan jurnalist, Xalqaro Choʻlpon mukofoti sovrindori, “Xalq soʻzi” – “Народное слово” gazetalari Bosh muharriri Oʻtkir Rahmat bilan “Soʻz va vijdon uygʻunligi” deb nomlangan adabiy-badiiy kecha tashkil etildi.

Mazkur tadbir ijodkor shaxs va yosh avlod oʻrtasida maʼnaviy koʻprik vazifasini oʻtashi bilan alohida ahamiyat kasb etdi. Uchrashuv davomida adabiyotning jamiyat hayotidagi oʻrni, soʻzning kuchi hamda jurnalistika masʼuliyati haqida atroflicha fikr almashildi.

Tadbirni universitet rektori Gʻofurjon Muxamedov ochib berdi. U oʻz nutqida Oʻtkir Rahmatning koʻp yillik samarali ijodiy faoliyati, uning oʻzbek jurnalistikasi va milliy adabiyot rivojiga qoʻshgan ulkan hissasini alohida eʼtirof etdi. Shuningdek, rektor adibning nafaqat ijodkor, balki fidoyi ustoz sifatidagi xizmatlariga ham toʻxtalib, uning asarlari yoshlar tarbiyasida muhim oʻrin tutishini taʼkidladi.

Tadbir davomida soʻzga chiqqanlar ustoz jurnalistning asarlari va publitsistik maqolalarida jamiyatdagi dolzarb masalalar keng yoritilishini qayd etdilar. Xususan, Oʻtkir Rahmat ijodida maʼnaviy qadriyatlar, insoniylik, halollik va zamon ruhining aks etishi bugungi kun oʻquvchisi uchun muhim tarbiyaviy ahamiyatga ega ekani aytib oʻtildi. Adib ijodidagi hayotiylik, samimiyat, inson qalbining nozik kechinmalari va Vatanga muhabbat tuygʻusining taʼsirchan ifodasi ishtirokchilarda katta taassurot qoldirdi.

Ijodiy kecha davomida universitet talabalari tomonidan adibning sheʼrlaridan namunalar ifodali oʻqib eshittirildi. Bu chiqishlar tadbirga oʻziga xos ruhiy kayfiyat bagʻishlab, yoshlarning adabiyotga boʻlgan qiziqishini yanada oshirdi. Shuningdek, talabalar oʻzlarini qiziqtirgan savollar bilan murojaat qilib, ijodiy faoliyat va jurnalistika sir-asrorlari boʻyicha batafsil javoblar oldilar. Ustoz Oʻtkir Rahmat yosh ijodkorlarga izlanishdan toʻxtamaslik va soʻzga vijdonan yondashish boʻyicha oʻz tavsiyalarini berdi.

Tadbir yakunida mehmon adibga samimiy minnatdorlik bildirilib, bunday uchrashuvlar yosh avlodning maʼnaviy dunyoqarashini boyitishda beqiyos ekani taʼkidlandi. Kechaning eng hayajonli lahzalarida ustoz Oʻtkir Rahmatga Chirchiq davlat pedagogika universitetining “Faxriy professori” ilmiy unvoni tantanali ravishda topshirildi.

Yunus BOʻRIYEV (“Xalq soʻzi”) olgan suratlar.