Oliy Majlis Senati Fan, taʼlim va sogʻliqni saqlash masalalari qoʻmitasi raisi oʻrinbosari Oral Ataniyazova Qoraqalpogʻiston Respublikasi Qonlikoʻl tumanida xizmat safarida boʻlib, hududlardagi dolzarb muammolarni oʻrgandi.

Tumanning “Madaniyat” mahallasida aholi bilan uchrashuv davomida Senatning 14-yalpi majlisida koʻrilgan masalalar yuzasidan maʼlumot berilib, fuqarolarning murojaat va takliflari tinglandi. Xususan, kuchli shamol oqibatida zarar koʻrgan xonadonlarga amaliy yordam koʻrsatish masalasiga alohida eʼtibor qaratildi.

Tuman hokimligi va mutasaddi tashkilotlar bilan oʻtkazilgan muloqotda hududni ijtimoiy-iqtisodiy rivojlantirish, infratuzilmani yaxshilash, ishga joylashish imkoniyatlarini va ijtimoiy xizmatlar sifatini oshirish masalalari muhokama qilindi.

Shuningdek, senator 21-sonli umumtaʼlim maktabida boʻlib, taʼlim tizimidagi dolzarb masalalarni pedagoglar bilan muhokama qildi. Jumladan, yoshlar, ayniqsa qizlarning reproduktiv salomatligi, sogʻlom turmush tarzi va maʼnaviy tarbiya masalalariga eʼtibor qaratildi.

Shu bilan birga, maktablarda autsorsing asosida yetkazib berilayotgan oziq-ovqat mahsulotlarining amaldagi qonunchilik talablariga muvofiqligi oʻrganildi. Oʻrganishlar natijasida boshlangʻich sinf oʻquvchilariga berilayotgan taomlar tasdiqlangan menyu talablariga toʻliq javob bermayotgani aniqlandi. Mazkur holat yuzasidan masʼullarga kamchiliklarni bartaraf etish boʻyicha koʻrsatmalar berildi.

Bundan tashqari, maktab hududida futbol maydonchasini barpo etish masalasi koʻrib chiqildi. Taʼkidlanganidek, ushbu loyiha 550 nafarga yaqin oʻquvchi taʼlim olayotgan muassasada sport infratuzilmasini rivojlantirish va mahalla aholisining jismoniy faolligini oshirishga xizmat qiladi.

Koʻtarilgan masalalar senator tomonidan nazoratga olindi hamda futbol maydonchasini grant asosida moliyalashtirish uchun Senat huzuridagi jamoat fondiga taqdim etish boʻyicha huquqiy tavsiyalar berildi.