Bu haqda davlat korxonasida joriy yilning I choragida uran ishlab chiqarish koʻrsatkichlarining bajarilishi, erishilgan natijalar va kelgusidagi vazifalarga bagʻishlangan kengaytirilgan videoselektor yigʻilishida maʼlum qilindi.

— Korxonamizda shuningdek, 3,7 trillion soʻmlik mahsulot ishlab chiqarilib, bu boradagi reja ortigʻi bilan uddalandi, — deydi “Navoiyuran” DK Bosh direktori Dj. Fayzullayev. — Investitsiya dasturi loyihalarini amalga oshirish doirasida 35,5 mln dollar miqdoridagi kapital qoʻyilmalar oʻzlashtirilib, mahalliylashtirish dasturidagi 15 ta loyiha doirasida 41 mlrd soʻmlik mahsulot ishlab chiqarildi. Sanoat kooperatsiyasi asosida mahalliy korxonalardan 449 mlrd soʻmlik mahsulot xarid qilindi.

Korxonada importni qisqartirishning maqsadli koʻrsatkichlari qariyb 15 mln dollarni, byudjetga toʻlovlar va soliqlar qiymati 1,2 trillion soʻmni tashkil etdi. Hisobot davrida jami tannarxni kamaytirish boʻyicha chora-tadbirlarning bajarilishi natijasida qariyb 145 mlrd soʻm iqtisod qilinishiga erishildi.

Yigʻilishda korxonaning hisobot davridagi faoliyati aniq koʻrsatkichlar asosida tahlil qilinib, erishilgan natijalar bilan bir qatorda mavjud imkoniyatlardan toʻliq foydalanilmagan jihatlar tanqidiy muhokama qilindi. Korxona rahbari uran mahsulotining mamlakat ijtimoiy-iqtisodiy taraqqiyotidagi strategik ahamiyatini alohida taʼkidladi.

Muhokamalarda zamonaviy axborot texnologiyalarini joriy etish orqali ishlab chiqarish jarayonlarining har bir bosqichida faoliyat samaradorligini onlayn rejimda nazorat qilish va tahlil etish, energiya resurslaridan oqilona foydalanish, infratuzilma loyihalarini amalga oshirishni jadallashtirish, qazib olish jarayonlari ustidan nazoratni kuchaytirish boʻyicha qatʼiy choralar koʻrish zarurligi qayd etildi.

Yigʻilish yakunida ishlab chiqarish hajmini oshirish, texnologik quduqlar sifatini yaxshilash, geotexnologik konlar faoliyatini takomillashtirish, burgʻilash va geologiya-qidiruv ishlarining samaradorligini oshirish boʻyicha aniq vazifalar belgilab berildi.

Taʼkidlandiki, belgilangan chora-tadbirlarning oʻz vaqtida va sifatli ijrosi korxonaning 2026-yildagi barqaror faoliyatini taʼminlash hamda yillik koʻrsatkichlarga erishishda muhim omil boʻlib xizmat qiladi.

Temur ESHBOYEV, “Xalq soʻzi”.