Soʻnggi yillarda Oʻzbekiston va Gruziya oʻrtasidagi hamkorlik barcha sohalarda, jumladan madaniyat va sanʼat yoʻnalishida ham izchil rivojlanib bormoqda. Gruziya Oʻzbekistonning Kavkaz mintaqasidagi muhim va yaqin hamkorlaridan biri hisoblanadi.

Bugungi kunda Oʻzbekiston va Gruziya oʻrtasidagi madaniy hamkorlik tobora kengayib borayotganini ikki davlatda tashkil etilayotgan xalqaro tadbirlarda sanʼatkorlarimizning faol ishtirokida ham yaqqol koʻrish mumkin.

Xususan, Oʻzbekistonda oʻtkazib kelinayotgan “Lazgi” xalqaro raqs festivali, Baxshichilik sanʼati xalqaro festivali kabi yirik xalqaro madaniy tadbirlarda Gruziya sanʼatkorlari muntazam ishtirok etib kelmoqda. Shuningdek, teatrlar oʻrtasidagi hamkorlik ham rivojlanib bormoqda. Ushbu hamkorlikni yanada rivojlantirish maqsadida, Oʻzbekistonda 9-11-mart kunlari “Gruziya madaniyati kunlari” tadbirlari boʻlib oʻtmoqda.

Madaniyat kunlari doirasida bugun, 9-mart kuni Madaniyat vazirligida Oʻzbekiston madaniyat vaziri Ozodbek Nazarbekov hamda Gruziya madaniyat vaziri Tinatin Rukhadze xonim oʻrtasida hamkorlik uchrashuvi boʻlib oʻtdi. Uchrashuv davomida bir qator hamkorlik masalalari muhokama etildi.

Uchrashuv davomida ikkitomonlama madaniy hamkorlikni yanada rivojlantirish maqsadida, quyidagi bir qator masalalar muhokama etildi:

— Madaniyat va sanʼat festivallarida muntazam ishtirok etish amaliyotini davom ettirish. Xususan, joriy yil aprel oyida Xiva shahrida boʻlib oʻtadigan “Lazgi” xalqaro raqs festivalida ishtirok etish;

— Kino sohasida hamkorlikni rivojlantirish, xususan, Gruziya Milliy film markazi hamda Oʻzbekiston Kinematografiya agentligi oʻrtasida hamkorlik Bitimini imzolash;

— Rustaveli nomidagi Gruziya Milliy akademik teatri hamda Alisher Navoiy nomidagi Oʻzbekiston davlat katta teatri oʻrtasida hamkorlikni yoʻlga qoʻyish va dasturni imzolash;

— Ikki davlatning milliy raqs sanʼatini rivojlantirish va keng targʻib qilish maqsadida, Tbilisi Xoreografiya maktabi hamda Toshkent davlat xoreografiya akademiyasi oʻrtasida hamkorlikni yoʻlga qoʻyish kabi takliflar koʻrib chiqildi.

Uchrashuv yakunida, Oʻzbekiston madaniyat vaziri Ozodbek Nazarbekov Gruziya madaniyat vaziri Tinatin Rukhadze xonimni “Lazgi” xalqaro raqs festivaliga shaxsan ishtirok etishini taklif etdi.

Maʼlumot oʻrnida, ikki davlat madaniyat vazirlari bugun poytaxtdagi Alisher Navoiy nomidagi Oʻzbekiston davlat akademik katta teatrida boʻlib oʻtadigan Oʻzbekistonda “Gruziya madaniyati kunlari”ning ochilish marosimida ishtirok etadi.