Respublika ixtisoslashgan travmatologiya va ortopediya ilmiy-amaliy markazi viloyat filialida ilk bor robot texnologiyasi yordamida operatsiya amalga oshirildi.

Markazda Xitoydan keltirilgan zamonaviy navigator yordamida mahalliy va xitoylik shifokorlar hamkorligida chanoq son boʻgʻimi bilan bogʻliq xastaligi bor ikki nafar bemorning operatsiyasi oʻtkazildi.

— Oʻtgan yili Xitoyda boʻlib, bir nechta tibbiyot muassasalarida malaka oshirishga muvaffaq boʻldik, — deydi Respublika ixtisoslashgan travmatologiya va ortopediya ilmiy-amaliy markazi viloyat filiali bosh shifokori Oybek Mamatqulov. — Malaka oshirish barobarida xitoylik hamkasblar bilan bir qator kelishuvlar imzolandi. Robot texnologiyasi yordamida operatsiyalarni amalga oshirish boʻyicha kelishuvlarga koʻra, muassasamizda ilk bor robototexnologiya yordamida chanoq son operatsiyasi muvaffaqiyatli bajarildi.

Maʼlumotlarga koʻra, oʻtgan yili markazda davolangan bemorlarning 9,5 ming nafari jarrohlik usulida shifo topgan boʻlsa, 6,5 ming nafari laparoskopik usulda davolangan. Ikki mingga yaqin bemorlar chanoq-son boʻgʻimi xastaliklaridan aziyat chekib, tegishli jarrohlik amaliyotlarini oʻtkazgan.

— Xorijiy davlatlarda robot texnologiyalari yordamida operatsiyalar 15-yildan beri amalga oshiriladi, — deydi Pekin universiteti professori, doktor Tian Hua. — Ushbu texnologiyaning qulay tomoni shundaki, asoratlar kam boʻladi, har bir operatsiya bemorning individual koʻrsatkichlari va aniq rejalar asosida oʻtkaziladi. Qolaversa, bemorning reabilitatsiya davri anʼanaviy operatsiyalardagidan koʻra ancha qisqaradi.

Markazda ushbu yangi texnologiyani ishga tushirish munosabati bilan oʻtkazilgan tadbirda soʻzga chiqqanlar Samarqand tibbiyotidagi bu yangilik tizimdagi islohotlar natijasi ekanligini taʼkidlashdi. Zamonaviy texnologiyalarning chekka hududlarga ham kirib borayotgani salomatligimizni yaxshilash, bemorlarning shifoxonalarda uzoq vaqt davolanish kabi qiyinchiliklardan asrashi bilan eʼtiborga loyiqligi qayd etildi.

Abdulaziz YOʻLDOSHEV, “Xalq soʻzi”.