Kecha, 25-aprel kuni futbol boʻyicha Angliya Premyer ligasining 34-tur oʻyinlari davom ettirildi. Kun doirasidan oʻrin olgan dastlabki bahsda muxlislar kichik sensatsiyaga guvoh boʻlishdi.

Tur oldidan turnir jadvalida 4-oʻrinni egallab turgan “Aston Villa” jamoasi 34-turda “Fulhem” maydoniga safar qildi. Turnir jadvalining oʻrta oʻrinlarida borayotgan “Fulhem” uchun na ligani tark etish, na yevrokuboklarga yoʻl olish ehtimoli mavjud edi. Shu sababli oʻyin oldidan koʻpchilik mehmonlarning gʻalabasini taxmin qilgan edi. Ammo, amalda boshqacha boʻldi.

Uchrashuvda hisob 43-daqiqada mezbonlar aʼzosi Rayan Sessenyon tomonidan ochildi va ushbu gol oʻyin oxiriga qadar yagonaligini saqlab qoldi.

Yaqin yillar ichida yevrokuboklar finalida oʻynagan va oʻtgan mavsum Yevropada sovrin yutishni ham uddalagan “Tottenhem” jamoasi soʻnggi yillarda APLning yetakchi klublari qatoridan oʻrin olgan edi. Ammo, bu mavsum jamoa uchun juda omadsiz oʻtmoqda.

Ayni vaqtda klub APLda jon saqlab qolish uchun kurashmoqda. 34-turda “shporlar” ligani tark etishi aniq boʻlgan “Vulverhempton” jamoasi bilan kuch sinashdi va muhim gʻalabani qoʻlga kiritdi.

Mazkur bahsda ham uchrashuv taqdirini yagona gol hal qildi. Ushbu golga 82-daqiqada Joau Palinya mualliflik qildi.

Soʻnggi yillarda oʻzining mazmunli oʻyinlari bilan futbol jamoatchiligi eʼtiboriga tushgan “Vest Hem” jamoasi bu mavsumda ligada qolish uchun kurashmoqda.

Jamoa ushbu turga kelib yana 3 ta muhim ochkoni qoʻlga kiritdi. Aniqrogʻi, Nunu Eshpiritu Santu boshqaruvidagi jamoa “Everton”ni 2:1 hisobida magʻlub etdi.

Uchrashuvda hisob 51-daqiqada Tomash Souchek tomonidan ochildi. 88-daqiqada Kirnan Dyusberi-Holl muvozanatni tikladi.

Biroq, 90+4-daqiqada Kallum Uilson jamoasiga gʻalaba keltirgan golni kiritdi. Shu tariqa oʻyin “Vest Hem”ning gʻalabasi bilan yakunlandi.

Sovrinli oʻrinlar uchun kurashni davom ettirayotgan “Liverpul” jamoasi ushbu turda ligadagi noqulay raqiblardan biri “Kristal Pelas” bilan kuch sinashdi. Uchrashuv oldidan koʻplab mutaxassislar mazkur turda “mersesaydliklar“ning ochko yoʻqotishini kutgan edi. Ammo, amalda boshqacha boʻldi.

“Liverpul”da darvozabonlar borasida jiddiy muammo yuzaga keldi. Oldinroq Jorji Mamardashvili oyogʻidan jarohat olgan boʻlsa, endi Alisson Bekker ham mushaklarini qayrib olgani aytildi. Shu boisdan bu bahsda “qizillar” darvozasini Freddi Vudman qoʻriqladi.

Shuningdek, Vataru Endo va Hugo Ekitike ham jarohati tufayli ushbu oʻyinda ishtirok eta olishmadi. Uchrashuvda hisob 35-daqiqada Aleksandr Isak tomonidan ochildi. Oradan 5 daqiqa oʻtib Endi Robertson hisobni 2:0 koʻrinishiga keltirdi. Birinchi boʻlim 2:0 hisobida yakunlandi.

Ikkinchi boʻlimning 71-daqiqasida Daniel Munyos hisobni qisqartirdi. 90+6-daqiqada esa Florian Virs oʻyindagi soʻnggi golni kiritdi. Shu tariqa oʻyin “Liverpul”ning gʻalabasi bilan yakunlandi. Ushbu gʻalaba evaziga jamoa 58 ochko bilan turnir jadvalida toʻrtinchi pogʻonaga koʻtarildi.

Turning markaziy oʻyini Londonda tashkil etildi. Unda chempionlik uchun kurashayotgan “Arsenal” jamoasi oʻz maydonida “Nyukasl”ni qabul qildi.

Oʻyin oldidan mehmonlar tarkibida jiddiy yoʻqotishlar mavjud edi. Entoni Gordon, Fabian Sher va Valentin Livramento kabi futbolchilar jarohat sabab maydonga tusha olishmadi. Joelinton esa diskvalifikatsiya tufayli bahsni oʻtkazib yubordi.

Uchrashuvda hisob 9-daqiqada Eberechi Eze tomonidan ochildi va ushbu gol yakunda “Arsenal”ga gʻalaba keltirdi. Oʻyin 1:0 hisobida Mikel Arteta boshchiligidagi jamoaning gʻalabasi bilan yakunlandi.