Kolumbiyaning janubi-gʻarbidagi Panamerika shossesida sodir etilgan portlash oqibatida kamida 14 kishi halok boʻldi. Yana 38 nafar inson jarohat olgan, jabrlanganlar orasida besh nafar bola ham bor. “Deutsche Welle” nashri xabariga koʻra hukumat hujum uchun FARK guruhining tarqoq qanoti vakillarini ayblamoqda.

Mahalliy OAV maʼlumotlariga koʻra, fojia Kauka viloyatining Kaxibio munitsipalitetida yuz bergan. Ichiga portlovchi modda joylangan silindr mikroavtobus ustiga tushib, portlagan.

Kauka gubernatori Oktavio Gusman voqeani “fojia” deb atab, mamlakatda “terrorchilik keskinlashuvi” haqida ogohlantirdi. Kolumbiya prezidenti Gustavo Petro hujumda mamlakatda qidiruvdagi jinoyatchilardan biri sanalgan Ivan Mordiskoni ayblagan. Davlat rahbari uni marhum narkobaron Pablo Eskobarga qiyoslab, hujumchilarni “terrorchilar, fashistlar va giyohvand modda savdogarlari” deb baholagan.

Ivan Mordisko 2016-yilda davlat bilan tinchlik kelishuvini imzolagan sobiq Kolumbiya Inqilobiy qurolli kuchlari — FARK tarkibidan chiqqan muxolif qanot yetakchilaridan biri hisoblanadi. U kelishuvni rad etgan va hozirda mintaqada faoliyat yuritmoqda.

Soʻnggi ikki kun ichida Valle-del-Kauka va Kauka hududlarida jami 26 ta hujum qayd etilgan. Kolumbiya qurolli kuchlari qoʻmondoni Ugo Lopesga koʻra, hodisalar asosan fuqarolarga taʼsir koʻrsatgan. Mamlakatda 31-may kuni boʻlib oʻtadigan prezident saylovlari oldidan xavfsizlik masalasi asosiy mavzulardan biriga aylanmoqda.