Bugun, 2-iyun kuni futbol boʻyicha Oʻzbekiston milliy terma jamoasi Jahon chempionati oldidan oʻrtoqlik uchrashuvida maydonga tushdi. Fabio Kannavaro boshqaruvidagi jamoamizga Kanada milliy terma jamoasi raqiblik qildi.

Uchrashuvning birinchi boʻlimida Oʻzbekiston terma jamoasi yaxshi taassurot qoldirdi. Ayniqsa, Eldor Shomurodovda hisobni ochish uchun bir nechta qulay imkoniyatlar boʻldi, ammo hujumchi ulardan foydalana olmadi.

Birinchi boʻlimdayoq jamoamiz majburiy oʻzgarishni amalga oshirdi. Jarohat olgan Aziz Gʻaniyev maydonni tark etdi va uning oʻrniga Abbos Fayzullayev tushirildi.

Ikkinchi boʻlimning 58-daqiqasida Kanada hisobni ochdi. Jamoa sardori Jonatan Osorio Abduvohid Neʼmatov qoʻriqlayotgan darvozani ishgʻol qildi.

Shundan soʻng Fabio Kannavaro bir qator oʻzgarishlarni amalga oshirdi. Akmal Mozgovoy, Aziz Amanov, Jahongir Oʻrozov, Igor Sergeyev va Sherzod Esanov maydonga tushirildi. Biroq bu oʻzgarishlar hisobga taʼsir koʻrsata olmadi.

Qoʻshimcha vaqtning birinchi daqiqasida Sherzod Esanovning noaniq uzatmasidan keyin mezbonlar tezkor qarshi hujum uyushtirdi va Jeyden Nelson uchrashuvga nuqta qoʻydi.

Shu tariqa, bahs Kanada milliy terma jamoasining 2:0 hisobidagi gʻalabasi bilan yakunlandi.

Maʼlumot uchun, Oʻzbekiston milliy terma jamoasi navbatdagi oʻrtoqlik uchrashuvini 8-iyun kuni oʻtkazadi. Unda jamoamizga Niderlandiya terma jamoasi raqiblik qiladi.