Maʼlumki, Prezidentimizning 2020-yil 28-sentyabrdagi “Lazgi” xalqaro raqs festivalini tashkil etish va oʻtkazish toʻgʻrisida»gi qarorida 2022-yildan boshlab har ikki yilda bir marotaba 25–30-aprel kunlari Xorazm viloyatining Xiva shahrida “Lazgi” xalqaro raqs festivali oʻtkazilishi belgilangan. YUNESKO shafeligida oʻtkazilayotgan “Lazgi” xalqaro raqs festivaliga 2026-yildan boshlab TURKSOY xalqaro tashkiloti ham shafelik qiladi.

2026-yilda uchinchi marotaba oʻtkazilayotgan III “Lazgi” xalqaro raqs festivaliga dunyoning 30 dan ortiq davlatlaridan 300 dan ziyod isteʼdodli raqqosalar, professional raqs jamoalari, raqs sanʼati ustalari, musiqashunos va sanʼatshunos olimlar, taniqli sanʼatkorlar, yetuk mutaxassislar, faxriy mehmonlar ishtirok etmoqda.

Festivalning tantanali ochilish marosimida Oʻzbekiston Respublikasi Prezidenti Administratsiyasi rahbari Saida Mirziyoyeva davlatimiz rahbarining festival ishtirokchilariga yoʻllagan tabrigini oʻqib eshittirdi. Shundan soʻng Ichanqalʼaning maftunkor chiroqlar yogʻdusida afsonaviy koʻrinish kasb etgan qadimiy maydoni uzra “Lazgi” sadolari yangradi.

Festival doirasida xorijiy va mahalliy raqs sanʼati ustalari, musiqashunos va sanʼatshunos olimlar, taniqli sanʼatkorlar va faxriy mehmonlar ishtirokida “Jahon madaniy taraqqiyotida raqs sanʼati: anʼana va umumbashariy qadriyatlar” mavzusidagi III xalqaro ilmiy-amaliy konferensiya oʻtkazildi.

Shuningdek, Oʻzbekiston va Turkiya madaniy qoʻshma komissiyasining III yigʻilishi, TURKSOY aʼzosi davlatlarning sanʼat va raqs oliy oʻquv yurtlari rektorlarining III yigʻilishi, “Turk dunyosining anʼanaviy raqsi antologiyasi” mavzusida konferensiya, “Etnomadaniy forum”larning oʻtkazilishi rejalashtirilgan. Festival doirasida raqs tanlovida esa ishtirokchilar ijodiy bellashadilar.

Odilbek ODAMBOYEV, “Xalq soʻzi”.