Adliya vazirligi joriy yilning 29-aprel kuni Pay fondlarining yagona reyestrini yuritish tartibi toʻgʻrisidagi idoraviy hujjatni davlat roʻyxatidan oʻtkazdi (roʻyxat raqami 3825)

Mazkur idoraviy hujjat pay fondlarining reyestrini shakllantirish, yuritish, unga oʻzgartirish kiritish, shuningdek pay fondini reyestrdan chiqarish va undagi maʼlumotlarni taqdim etish tartibini belgilaydi.

“Investitsiya va pay fondlari toʻgʻrisida”gi Qonunning 4-moddasiga koʻra, investitsiya faoliyatini amalga oshirish maqsadida 2 va undan ortiq shaxslarning (investorlarning) oʻzi ishonchli boshqaruvga bergan pul mablagʻlari yigʻindisi pay fondidir.

Pay fondi Istiqbolli loyihalar milliy agentligi tomonidan yagona reyestrga kiritilgan hamda Agentlikning veb-saytida eʼlon qilingan paytdan tashkil etilgan deb hisoblanadi.

Pay fondini yagona reyestrga kiritish uchun pay fondining ishonchli boshqaruvchisi ariza, pay fondini ishonchli boshqarish haqidagi shartnoma nusxasi va boshqa hujjatlarni Agentlikka taqdim etadi.

Ariza olinganidan keyin Agentlik 7 ish kuni ichida pay fondini reyestrga kiritish toʻgʻrisida qaror qabul qiladi.