Hukumat qarori (181-son, 17.04.2026-y.) bilan “Volontyorlar va koʻngilli qutqaruvchilarni “Favqulodda vaziyatlar volontyori” jamoatchilik guruhlariga jalb etish va ijtimoiy qoʻllab-quvvatlash tartibi toʻgʻrisida”gi nizom tasdiqlandi.

Nizomga koʻra, jamoatchilik guruhlariga faqat 18 yoshdan katta boʻlgan Oʻzbekiston fuqarolari jalb etiladi.

Bunda aʼzo boʻlish istagidagi shaxslar Volontyorlar elektron platformasi (volontyor.uz) orqali hisobga qoʻyilgandan soʻng hududiy favqulodda vaziyatlar boshqarmalariga (bosh boshqarmalariga) ariza bilan murojaat qiladi.

Jamoatchilik guruhlarining aʼzolariga quyidagi imtiyozlar taqdim etiladi:

— Favqulodda vaziyatlar vaziri tavsiyanomasiga asosan Favqulodda vaziyatlar vazirligi akademiyasining bakalavriat yoʻnalishiga oʻqishga kirishda oʻzlari toʻplagan ballarning 5 foizi miqdorida qoʻshimcha ball berish;

— koʻngilli qutqaruvchilarga “mahalla yettiligi” tavsiyanomasiga asosan hududiy qutqaruv tuzilmalarida qutqaruvchi lavozimiga ishga qabul qilish boʻyicha tanlovda belgilangan tartibda ustuvorlik berish.

Akademiyaga oʻqishga kirishda qoʻshimcha ball berish uchun tavsiyanoma Favqulodda vaziyatlar vazirligi tomonidan tashkil etiladigan tanlovda gʻolib boʻlgan volontyorlarga beriladi.

Tanlov 18 yoshdan 25 yoshgacha boʻlgan volontyorlar ishtirokida oʻtkaziladi.

Volontyorlarning faoliyati tuman (shahar), viloyat va respublika darajasida quyidagi mezonlar asosida toʻplangan ballar orqali baholanadi:

— “mahallabay” tamoyili asosida favqulodda vaziyatlarning oldini olish boʻyicha amalga oshirgan ishlari;

— favqulodda vaziyatlarda qidiruv-qutqaruv ishlaridagi ishtiroki;

— favqulodda vaziyatlar zonasida aholiga birinchi tibbiy yordam koʻrsatish va evakuatsiya tadbirlaridagi ishtiroki va boshqalar.

Baholash natijalariga koʻra har bir hududdan 1 nafardan jami 14 nafar volontyorga tavsiyanoma beriladi.

Tavsiyanoma 1 oʻquv yili uchun amal qiladi.