Insoniyat kitob bosish dastgohini yaratgandan soʻng dunyo karrasiga rivojlana boshladi. Ilm-u maʼrifat, global yaqinlik borasida katta qadamlar tashlandi. Undan keyingi ijtimoiy neʼmatlar, yangi yaratiqlar ham dunyoni yaxshiladi, iqtisodiyot rivojlandi.

Shunday ekan, bugungi kunning kashfiyotlariga ochiq boʻlish, unga moslashish ham taraqqiyot sari yetaklaydi. Misol uchun sunʼiy intellekt bilan ishlamagan odam har jabhada orqada qolib ketishi mumkin. Bugun uni qanday qilib oʻz foydamizga ishlata bilish, mamlakatni rivojlantirishda uning ishtirokini kengaytirish ustida ishlash vaqti.

Shu oʻrinda Oʻzsanoatqurilishbank “Sunʼiy intellekt va raqamli transformatsiya: Oʻzbekiston iqtisodiyoti rivojlanishning yangi bosqichi” mavzusida xalqaro konferensiya tashkil etdi.

Konferensiya sunʼiy intellekt texnologiyalarini moliya, sanoat, qurilish, qishloq xoʻjaligi, sogʻliqni saqlash sohalariga joriy qilish, shuningdek, moliyaviy institutlarni, taʼlim tizimini zamonaviylashtirish, biznes jarayonlarida qoʻllash masalalari muhokama qilindi.

“Sunʼiy ong keng tarqalmoqda. Buni bilmaydigan xodim ertangi kunda ishlashni oʻylab qolyapti. Shu sababli biz koʻrsatyapmizki, bu trend. Sunʼiy ongni xodimlar yordamchi qilib olib, bir vaqtda bir qancha ishlarni bajarishi mumkin. Bankimiz ichida ham, tashqi faoliyatda ham buni keng tatbiq etib boryapmiz”, — deydi Oʻzsanoatqurilishbank biznes bosh direktori Temur Norov.

Xususan, bankning “SQB AI Maslahatchisi” platformasi aholiga tadbirkorlik boshlash borasida maslahat berib, uning imkoniyatlarini tahlil qilib berar ekan. Shuningdek, ilova bank bilan ham chambarchas bogʻlangan boʻlib, moliyaviy koʻmak jarayonlarini tezlashtirishi aytiladi.