Adliya vazirligi Xorijiy tillar va umumtaʼlim fanlarini bilish darajasini belgilovchi sertifikatlar roʻyxatiga oʻzgartirish va qoʻshimchalar kiritish toʻgʻrisidagi idoraviy hujjatni davlat roʻyxatidan oʻtkazdi. Bu haqida vazirlikning rasmiy Telegram-kanalida maʼlumot berildi.

Mazkur oʻzgartirish va qoʻshimchalarga asosan quyidagilar belgilangan:

endilikda ingliz tilidan beriladigan TOEFL iBT sertifikatining muvofiqlik darajasi 1–6 ballik tizim boʻyicha belgilanadi;
bakalavriatning fanlar majmuasida chet tili fani mavjud boʻlgan taʼlim yoʻnalishlariga qabulda B1 darajadagi milliy yoki xalqaro tan olingan sertifikatga ega abituriyentlarga ushbu fandan belgilangan maksimal ballning 75 foizi miqdorida ball beriladi;
pedagog xodimlarga ustama toʻlashda ingliz tilidan beriladigan TKT, TESOL, TEFL va TESL sertifikatlarining amal qilish muddati hisobga olinadi;
kasbiy taʼlim tashkilotlarining pedagoglari xorijiy tilda maxsus fanlarni oʻqitganligi uchun ularning lavozim maoshiga nisbatan milliy va xalqaro tan olingan B2 sertifikati uchun 50 foiz, C1 sertifikati uchun 100 foiz miqdorda har oylik ustamalar beriladi;
oʻqituvchilariga Digital SAT sertifikatining matematika boʻlimidan 750 va undan yuqori ball olgan taqdirda ustama belgilanadi;
umumiy oʻrta taʼlim maktablaridagi musiqa madaniyati va jismoniy tarbiya fanlari oʻqituvchilariga B+ va undan yuqori darajadagi sertifikatlar uchun ustama beriladi.