Xabar berganimizdek, Senatning Byudjet va iqtisodiy masalalar qoʻmitasi tomonidan Toshkent viloyatida “Tashabbusli byudjet” jarayonlari doirasida 2024–2025-yillarda gʻolib deb topilgan loyihalarning amalga oshirilishi holati yuzasidan oʻrganish olib borildi.

Xususan, viloyat boʻyicha 2024-yilda 513 ta, 2025-yilda esa 470 ta loyiha gʻolib deb topilgan. Shuningdek, 2025-yilda gʻolib deb topilgan loyihalarning 71 foizida ishlar yakunlangan boʻlsa, 136 ta loyihada ishlar hali ham davom etmoqda.

Tahlillarga koʻra 2024-yilda Toshkent viloyati boʻyicha 4 410 ta loyiha taklif etilib, shundan 3 410 tasi ovoz berish bosqichiga oʻtkazilgan. Jami 790 mingga yaqin ovoz berilgan qiymati 574 mlrd soʻmlik 513 ta loyiha gʻolib deb topilgan.

Oʻtgan 2025-yilda esa 4 518 ta loyiha taklif etilib, 3 295 tasi ovoz berish bosqichiga oʻtkazilgan hamda qiymati 594 mlrd soʻmlik 470 ta loyiha gʻolib deb topilgan.

Oʻrganishlar davomida ishchi guruh Angren shahri va Ohangaron tumanida boʻlib, qator ijtimoiy ahamiyatga ega obyektlar holatini koʻzdan kechirdi.

Shu bilan birga, oʻrganishlar jarayonida ayrim loyihalarni amalga oshirishda kamchiliklar mavjudligi, jumladan, asfaltlash ishlari sifati talab darajasida emasligi hamda ishlar belgilangan muddatlarda yakunlanmayotgani aniqlandi.

Oʻrganishlar yakuni boʻyicha loyihalar ijrosini jadallashtirish, ishlar sifatini oshirish va jamoatchilik nazoratini kuchaytirish yuzasidan tegishli taklif va tavsiyalar ishlab chiqildi hamda masʼul idoralarga aniq vazifalar belgilab berildi.