AQSHning Vashington shtatidagi Takoma shahrida joylashgan “Foss” oʻrta maktabida hujum sodir boʻldi. Bu haqda “The New York Times” xabar berdi.

Nashr maʼlumotlariga koʻra, hodisa oqibatida olti kishi jarohat olgan. Ulardan besh nafari oʻquvchi, yana biri maktab qoʻriqchisi ekani maʼlum qilingan.

Takoma maxsus xizmatlari maʼlumotiga koʻra, chaqiruv 13:30 atrofida “faol hujum” haqida kelib tushgan. Hodisa maktab hududida yuz bergan boʻlib, dastlab bir nafar jabrlanuvchi binodan tashqarida topilgan, keyin esa qutqaruvchilar ichkariga kirib boshqa yaradorlarga yordam koʻrsatgan.

Toʻrt nafar oʻquvchi pichoq jarohati bilan shifoxonaga yotqizilgan. Qoʻriqchi ham jarohat olib, shifoxonaga olib ketilgan. Takoma politsiyasi vakili Shelbi Boydning aytishicha, yana bir oʻquvchi gumonlanuvchi sifatida ushlangan. U besh modda boʻyicha birinchi darajali hujum aybi bilan qoʻlga olingan.

Rasmiylarga koʻra, mahalliy vaqt bilan soat 16:00 ga qadar barcha jabrlanganlar ahvoli barqaror boʻlgan. Yaradorlar MultiCare Tacoma General va MultiCare Allenmore shifoxonalariga yetkazilgan.

Hodisadan soʻng maktabda xavfsizlik tartibi joriy etilgan. Shundan soʻng, ota-onalarga farzandlarini olib ketishga ruxsat berilgan. Oʻquvchilarga 14:45 da javob berilgan, juma kungi darslar esa bekor qilingan.