Oliy

Senator

Oliy

Senator

Oliy Majlis Senati Yoshlar, xotin-qizlar, madaniyat va sport masalalari qoʻmitasi aʼzosi Malika Kadirxanova tomonidan Oʻzbekiston Milliy teleradiokompaniyasi raisi Abdurashid Juraboyev nomiga yuborilgan senator soʻrovi ijrosi yuzasidan amaliy choralar koʻrildi.

Soʻrovda teleradiokompaniya tizimida faoliyat yuritayotgan xodimlar uchun munosib va xavfsiz mehnat sharoitlarini yaratish, ayniqsa, nogironligi boʻlgan shaxslar va keksa yoshdagi xodimlar uchun infratuzilmaviy qulayliklarni kengaytirish masalalariga alohida eʼtibor qaratilgan edi.

Rasmiy javobga koʻra 2025–2030-yillarga moʻljallangan manzilli dastur asosida kompaniya tizimidagi binolarda bosqichma-bosqich rekonstruksiya va qurilish-montaj ishlari amalga oshirilmoqda. Hozirgi kunda markaziy telekanallar joylashgan 4 ta binoda mukammal taʼmirlash ishlari olib borildi hamda zamonaviy studiya majmualari barpo etildi, muhandislik-kommunikatsiya tarmoqlari yangilandi va texnik jihatdan qayta jihozlandi.

Jumladan, “Madaniyat va maʼrifat” va “Dunyo boʻylab” telekanallari joylashgan bino 1954-yilda qurilgan boʻlib, 1987-yilda soʻnggi bor taʼmirlangan edi. “Sport” va “Futbol” telekanallari faoliyat yuritayotgan bino esa 1978-yilda barpo etilgan boʻlib, 2007-yilda joriy taʼmirdan chiqarilgan. Ushbu binolarda kapital rekonstruksiya ishlari bajarilib, ular zamonaviy talablar asosida yangilangan.

Toshkent radioeshittirish uyi binosida jismoniy imkoniyati cheklangan shaxslar uchun qulay shart-sharoit yaratish maqsadida zamonaviy lift oʻrnatilgan va foydalanishga topshirilgan.

Senator soʻrovida koʻtarilgan masalalar ijrosi taʼminlanib, MTRK tizimida mehnat sharoitlarini yaxshilash va zamonaviy infratuzilmani shakllantirish borasida amaliy natijalarga erishilmoqda.