Prezidentimiz kimda-kim “Birinchi chorak koʻrsatkichi yaxshi boʻldi, yil yakunigacha ham shunday davom etadi”, deb xotirjamlikka berilsa, xato qilishini qayd etdi.

“Takror aytyapman: global ziddiyatlar, qarama-qarshiliklar, yetakchilik uchun kurash avj olayotgan hozirgi sharoitda dunyo oldingidek «sokin” boʻlmaydi. Bunday vaziyatda barcha rahbarlar oʻzi odatlanib qolgan ish uslubi, yondashuvi, kerak boʻlsa, dunyoqarashini mutlaqo oʻzgartirishi zarur», – dedi Prezidentimiz.

Bu yil banklar orqali kichik va oʻrta biznesni rivojlantirishga 140 trillion soʻm berilmoqda. Masalan, kichik biznesga berilgan har 1 milliard soʻm kredit hisobiga Shirin shahrida 20 ta, Uchquduqda 17 ta, Xonobod va Soʻxda 14 tadan, Tomdi tumanida 13 ta doimiy ish oʻrni yaratilgan.

Biroq Uchkoʻprik, Piskent, Boʻstonliq, Karmana, Qoʻrgʻontepa tumanlarida 1 milliard soʻmlik kreditga oʻrtacha 3 ta ish oʻrni toʻgʻri kelmoqda.

Agar hamma tuman banklari kreditlarni eng samarali loyihalarga yoʻnaltirganida, qoʻshimcha 36 ming yangi ish oʻrni yaratilgan boʻlardi, norasmiy ishlayotgan yana 60 ming odamning daromadi “soya”dan chiqardi.

Shuning uchun loyiha tanlashda, kredit resurslarini ishlatishda sunʼiy intellekt kerak. Lekin viloyat, tuman bankirlarini sunʼiy intellektga oʻqitib, kredit resursini tumanga eng katta samara beradigan loyihalarga yoʻnaltirishni oʻrgatish ishlari sustligi tanqid qilindi.

Soha masʼullariga tuman bankirlarini sunʼiy intellektga oʻqitishni boshlash, banklarda “Sunʼiy intellekt maslahatchisi” platformasini ishga tushirish topshirildi. Bu platforma tadbirkorlarga kredit olish uchun loyihaning parametri, risklari, bozordagi talabni sunʼiy intellekt yordamida tahlil qilib, tayyor yechimlarni berishi kerakligi koʻrsatib oʻtildi.