Romitan tumanidagi Bogʻcha qishlogʻida yashovchi Shahlo Subhonovaga Ijtimoiy himoya milliy agentligi vakillari tomonidan vaucher topshirilishi bir yildan buyon ogʻir xastalikka chalinib, toʻshakka mixlanib qolgan ayolning sogʻayib ketishiga boʻlgan ishonchini mustahkamladi.

— Davlatimizdan minnatdorman, — deydi u. — Meni shunday paytda yolgʻizlatib qoʻymadi. Tuman tibbiyot birlashmasida chuqur koʻrikdan oʻtishim, davolanishim, shuningdek, jarrohlik amaliyotiga sarflanadigan barcha xarajatlar shu vaucher orqali toʻlanayapti. Bunga qadar ijtimoiy xodimlar tomonidan oilaviy ahvolim oʻrganilib, bir qator yordamlar koʻrsatilgandi. Gapning ochigʻi, sharoitim ogʻirligi sabab farzandlarimni oʻqishi qanday boʻlarkan, degan oʻyda edim. Birining shartnoma puli toʻlab berildi. Ikkinchisi esa maktabdagi fan toʻgaraklariga bepul oʻqishi uchun imkoniyat yaratildi.

Shahlo Subhonovaga bunday yordam davlatimiz rahbarining shu yil 17-fevralidagi “Muborak Ramazon oyida ehtiyojmand aholini davlat tomonidan ijtimoiy qoʻllab – quvvatlash choralari toʻgʻrisida”gi qaroriga muvofiq koʻrsatildi. Qarorga muvofiq, Buxoro viloyatida jami 31 ming nafardan ziyod ijtimoiy himoyaga muhtoj fuqaroga bir martalik moddiy yordam koʻrsatilmoqda. Davolanishi va jarrohlik amaliyoti talab etiladigan 75 fuqaroga esa vaucherlar taqdim qilindi.

Istam IBROHIMOV, “Xalq soʻzi”.