Tasavvur qiling: chekka qishloqda yashovchi ayol ishsiz. Turmush oʻrtogʻi esa azbaroyi qora qozonni qaynatish vajidan sovuq oʻlkalarga ishlagani ketgan. Hali oq-u qorani tanimagan bolalar esa ota yoʻliga intizor. Ana shunday pallada kutilmaganda ayolni mahallaga chorlab, “Sizga davlat tomonidan 20 sotixli issiqxona barpo etishga yordam koʻrsatiladi. Ishlab roʻzgʻoringiz kam-u koʻstini toʻldirasiz”, degan taklifni berishadi.

Tomorqasini gulday yashnatishga odatlangan ayolning koʻngli yorishadi. Uyga qaytadi-yu musofirchilik tashvishlari girdobida yurgan turmush oʻrtogʻi Jamil Nabiyevga qoʻngʻiroq qiladi.

— Ortga qayta qoling, dedim, — deya eslaydi Nazira Nurova. — Oʻshanda oʻtgan yilning kech kuzi edi. Xoʻjayinim rozi boʻldi. Ikkovlon shu 20 sotixli issiqxonada sidqidildan ishlashga kirishdik. Bahorga chiqar-chiqmas mehnatimiz samarasini koʻrdik. Pomidor-u bodringning bozori chaqqon. Shukr, endi roʻzgʻorimiz but.

— Qahramon mahallasidagi issiqxona hamda tomorqa xoʻjaliklarini oralab, kambagʻallik reyestriga kiritilgan oilalarga davlatimiz tomonidan juda katta madad berilganiga guvoh boʻldim, — deydi xalq deputatlari Romitan tuman Kengashi deputati Maxfirat Atoyeva. — Oʻtgan yil oxirida bu yerdagi 103 nafar tomorqachiga bank krediti asosida issiqxonalar qurib berilgan edi. Oʻttiz yil muddatga shartnoma asosida ajratilgan bu yerlar shu oilalar uchun moʻmay daromad manbaiga aylandi. Biz, deputatlar mazkur hududga tez-tez kelib, odamlarni tashvishlantirayotgan masalalarga yechim topishga, ilgʻor tomorqachilarning tajribasini ommalashtirishga harakat qilyapmiz.

Darhaqiqat, bu yerda ibrat olsa arzigulik ishlar oz emas. Aksariyat oilalar omilkorlik bilan ishlab, issiqxona qurilishi uchun ajratilgan imtiyozli kreditni dastlabki mavsumdayoq toʻlashga muvaffaq boʻlishmoqda. Shundaylar orasida aka-uka Nekmurod va Toʻymurod Hamidovlar ham bor.

— 25 sotix yerda dehqonchilik qilyapmiz, — deydi Nekmurod Hamidov. — Pomidordan yaxshi hosil oldik. Yerga bir muddat “dam” berib, yana ekin-tikin ishlariga kirishamiz. Shu tariqa yil davomida salkam yuz million soʻm daromad qilish niyatidamiz. Sezayotganingizdek, endi sovuq oʻlkalarga ishlagani borish biz uchun oʻtmishga aylandi.

Nekmurodning buni alohida taʼkidlashi bejiz emas. Aka-uka tirikchilik vajidan Rossiyaga ishlagani ketishardi. Musofirchilikda esa bilasiz, hech kimga oson boʻlmagan. “Uzoqdagi quyruqdan yaqindagi oʻpka yaxshi” deganlaricha bor ekan. Qolaversa, oila davrasida boʻlmoq, bolalarni otalik mehridan bahramand etmoqlikning oʻzi ham katta bir davlat.

Aytmoqchi, Qahramondagi tomorqachilarning 19 nafarini 30 yoshgacha boʻlganlar tashkil qilyapti. Ular pomidor-u bodring, bulgʻor qalampiri, qulupnay, karam kabi mahsulotlar yetishtirib, bozorni toʻkin etishga baholi qudrat hissa qoʻshishmoqda.

Istam IBROHIMOV, “Xalq soʻzi”.