Joriy yilning 4–6-iyun kunlari Toshkent, Termiz va Samarqand shaharlarida Markaziy va Janubiy Osiyo oʻrtasida oʻzaro bogʻliqlikni mustahkamlashga qaratilgan “Termiz muloqoti”ning ikkinchi yigʻilishi oʻtkaziladi.

Mazkur nufuzli xalqaro tadbir mintaqaviy hamkorlikni kengaytirish, iqtisodiy aloqalarni rivojlantirish hamda barqaror taraqqiyot yoʻnalishidagi muloqot maydoni sifatida muhim ahamiyat kasb etmoqda.

Maʼlumki, oʻtgan yili Termiz shahridagi “Termiz” xalqaro savdo markazi erkin savdo zonasida boʻlib oʻtgan ilk yigʻilish “Tinchlik, doʻstlik va farovonlikning umumiy makonini barpo etish” gʻoyasi asosida yuqori saviyada tashkil etilgan edi. Unda xavfsizlik, iqtisodiy hamkorlik, investitsiya muhitini yaxshilash hamda xususiy sektor rolini kengaytirish masalalari muhokama qilingan boʻlib, bu xalqaro doirada katta qiziqish uygʻotgan.

BMT Bosh Assambleyasi tomonidan qoʻllab-quvvatlangan tashabbus doirasida ilgari surilayotgan ushbu muloqot Markaziy va Janubiy Osiyo oʻrtasida ishonchli hamkorlikni mustahkamlash, oʻzaro bogʻliqlikni kuchaytirish va barqaror rivojlanishni taʼminlashga xizmat qilmoqda.

Ayni paytda Surxondaryo viloyatida yuqori darajadagi mehmonlar va ishtirokchilarni munosib kutib olish maqsadida barcha tashkiliy-tayyorgarlik ishlari jadal olib borilmoqda. Termiz shahri infratuzilmasi, transport va xizmat koʻrsatish tizimi xalqaro tadbir talablariga mos holatga keltirilmoqda.

Qadimiy va zamonaviy qiyofani uygʻunlashtirgan Termiz shahri bugungi kunda mintaqa uchun muhim logistika va savdo markazlaridan biriga aylanib bormoqda. “Termiz” xalqaro savdo markazi, “Termiz Kargo Markaz” xalqaro logistika xabi hamda turli taʼlim va xizmat koʻrsatish muassasalari shaharning iqtisodiy salohiyatini yanada oshirmoqda.

Tadbir doirasida ishtirokchilar ushbu zamonaviy inshootlar faoliyati bilan yaqindan tanishishi ham rejalashtirilgan.

Farhod ESONOV, “Xalq soʻzi”.