Prezidentimiz Farmoniga muvofiq, Oʻzbekiston Respublikasi Konstitutsiyaviy sudining ekspertlar guruhi katta eksperti Mirboboyev Baxtiyor Shamsutdinovich “Doʻstlik” ordeni bilan mukofotlandi.

Ushbu yuksak mukofot ustozga davlat organlaridagi koʻp yillik samarali mehnati, mamlakatimizda sud-huquq tizimini rivojlantirish va uning nufuzini mustahkamlash, sohada islohotlarni jadal amalga oshirish, jamiyatda qonuniylikni taʼminlash, adolatni qaror toptirish orqali inson qadr-qimmatini ulugʻlash, fuqarolarning huquq va manfaatlarini roʻyobga chiqarishga qoʻshgan munosib hissasi, yuqori malakali kadrlarni tayyorlash, yosh avlodni Vatanga muhabbat va sadoqat ruhida tarbiyalash borasidagi ibratli faoliyati, ijtimoiy-siyosiy hayotdagi faol ishtiroki hamda tavalludining 80-yilligi munosabati bilan berildi.

Darhaqiqat, ustozimiz Baxtiyor Mirboboyev mamlakatimizning huquqshunoslik fani va amaliyoti tarixida alohida oʻringa ega, oʻzining halolligi, vazminligi, keng tafakkuri, yuksak madaniyati va masʼuliyati bilan boshqalardan ajralib turadi. Ushbu choʻng va nihoyatda kamtarin siymo vujudida oʻziga xos ichki sokinlik balqib turadi, tiynatida esa ulkan bir donishmandlik ham hamisha boʻy koʻrsatadi.

Ustoz har bir inson yoki istalgan bir huquqshunos orzu qiladigan mansab va martaba darajalariga erishgan. Lekin, faqat halol yashash, mehnat bilan roʻzgʻor tebratish kabi ulugʻ insoniy prinsiplaridan bir zum ham chekingani yoʻq. Hatto eng nufuzli davlat organlariga rahbarlik qilayotgan bir paytda ham bolaligidan oʻrgangan sevimli kasbi duradgorligini kanda qilgan emas. Va mana shu kasb orqasidan roʻzgʻoriga qoʻshimcha daromad keltirgan...

Bu insonning bosib oʻtgan sharafli hayot yoʻliga nazar tashlar ekanmiz, Oʻzbekiston Respublikasi Konstitutsiyaviy sudi raisligidek yuksak lavozimda ham, shuningdek, yuridik taʼlim muassasasining oddiy bir oʻqituvchisi sifatida faoliyat yuritganida ham barchaga bir xil kamtarlik bilan insoniy munosabatda boʻlganini juda koʻpchilik aytib yuradi.

Ustozning mamlakatimiz huquqiy taraqqiyotida xizmatlari koʻp boʻlsa-da, ayniqsa, davlat mustaqilligining dastlabki yillaridagi mutlaqo yangi huquqiy tizimni barpo etish, suveren respublikaning qonunchilik bazasini yaratish davrida beqiyos hissasi borligi tarixiy faktdir. Eski shoʻrolar mafkurasining qoldiqlaridan, bir tomonlama qarashlardan butunlay voz kechib, demokratik huquqiy davlat poydevorini qurish juda katta bilimni, siyosiy jasoratni va teran mantiqni talab qilardi. Mana shunday tarixiy va ziddiyatli pallada Baxtiyor Mirboboyev oʻzining bor intellektual salohiyati ishga soladi. U kishining bevosita ishtiroki, ilmiy va nazariy xulosalari koʻmagida koʻplab normativ-huquqiy hujjatlar ishlab chiqiladi va qabul qilinadi.

1990-1991-yillarda ustoz davlat suvereniteti va mustaqilligining huquqiy asoslarini ishlab chiqishda yetakchi mutaxassislardan biri sifatida ishtirok etadi va milliy davlatchilikning huquqiy poydevori yaratilishiga amaliy hissa qoʻshadi.

Keyinchalik Konstitutsiyaviy sud raisi sifatida faoliyat yuritgan yillarida parlament tomonidan qabul qilinayotgan qonunlarning hamda Prezidentning farmon va qarorlari, ijro hokimiyati tomonidan chiqarilayotgan qarorlarning Bosh qomusimizga qay darajada mosligini, ular fuqarolarning huquq va erkinliklarini cheklab qoʻymayotganini oʻta sinchkovlik va professionalizm bilan nazorat qiladi.

Yaqinda bir guruh hamkasblar bilan ustozning sharafli hayot yoʻli, oʻziga xos insoniylik fazilatlari haqida uzoq suhbatlashdik. Suhbat davomida bir haqiqatga yana bir bor iqror boʻldik. Baxtiyor aka oʻz davrida qanchalik yuqori siyosiy va maʼmuriy organlarda nufuzli lavozimlarda ishlamasin, qalban hamisha kamtar, kitobsevar, ilmga va haqiqatga fidoyi inson boʻlib qolgan. U kishining qabuliga kelgan har bir yosh tadqiqotchi yoki oddiy xodim katta bir davlat organi rahbarining emas, balki talabchan boʻlsa-da, nihoyatda samimiy va donishmand ustozning qarshisida turgandek his qiladi. Mana shunday ichki madaniyat, ruhiy soflik va maʼnaviy butunlik ustozni zamondoshlari koʻz oʻngida haqiqiy ulugʻlik va halollik mezoniga aylantirgan.

U kishi uchun dunyodagi eng katta unvon, eng oliy mukofot — vijdon pokligi, halollik va qonunning buzilmasligi. Ustozning shaxsiy hayoti va kasbiy faoliyati oʻrtasida hech qachon uzilish yoki ziddiyat boʻlmagan. U uyda, oila davrasida qanday halol, kamtar va sofdil inson boʻlsa, sud minbarida ham, davlat ahamiyatiga molik qarorlarni imzolayotganda ham aynan shunday prinsipial, sodiq va keskin inson edi.

Bugungi kunda vatanimizda davlatimiz rahbari tomonidan sud-huquq tizimini tubdan demokratlashtirish, sudyalarning mustaqilligini taʼminlash va qonun ustuvorligini jamiyatning bosh mezoniga aylantirish borasida ulkan, tarixiy ishlar amalga oshirilmoqda.

Ilm ahliga, ayniqsa, davlat qurilishi va konstitutsiyaviy huquq sohasida mehnat qilgan faxriy olimlarimizning merosiga koʻrsatilayotgan eʼtibor mutlaqo yangi bosqichga koʻtarildi.

Baxtiyor Mirboboyevning qoldirgan boy ilmiy merosi va monografik asarlarini xronologik va mantiqiy ketma-ketlikda tahlil qilsak, u kishining davlat huquqi, inson huquqlari, suverenitet nazariyasi va konstitutsiyaviy nazorat tizimini rivojlantirishga qoʻshgan hissasi naqadar salmoqli va fundamental ekaniga guvoh boʻlamiz. Uning har bir tadqiqoti shunchaki quruq nazariy mulohazalardan iborat emas, balki bevosita amaliyotga tatbiq etilgan jonli qonunchilik manbaidir.

Ustozning hayot maktabi bizga aynan mana shu sukunatning, vazminlikning kuchini oʻrgatdi. Olim shovqin-suronli davralardan, oʻzini koʻrsatish va balandparvoz maqtovlardan hamisha yiroq yuradi. U kishining sukunati — ojizlik yoki beparvolik emas, balki qonun ustuvorligi va odamlar, jamiyat oldidagi masʼuliyati chuqur tafakkurning, ichki bir vijdoniy qatʼiyatning ramzi.

Adolat tarozisini toʻgʻri tutish faqat kasbiy mahorat emas, balki Yaratgan oldidagi, millat va vijdon oldidagi ulkan ilohiy omonatdir.

Baxtiyor Shamsuddinovich ana shu omonatga butun hayoti davomida zinhor xiyonat qilmadi va hanuz shu eʼtiqod bilan yashab kelmoqda. Insondan qoladigan eng buyuk meros — bu halol yashalgan umr, xalqning duosi, yaratilgan asarlar va ilm yoʻlida tarbiyalangan sodiq shogirdlardir.

El-yurtimiz taraqqiyoti yoʻlida uzoq yillar samarali faoliyat yuritgan, halollik va poklik bilan jamoatchilik oʻrtasida alohida hurmat qozongan olim bugun davlatimiz va xalqimiz eʼzozida.

Biz, ustozning ilmiy maktabini koʻrgan, oʻgitlaridan bahramand boʻlgan shogirdlar yangilanayotgan va yuksalayotgan Oʻzbekistonning huquqiy tizimini rivojlantirishda Baxtiyor Mirboboyev barpo etgan xolislik va qatʼiyat mezonlariga suyanamiz.

Bu moʻtabar siymoning vazmin qiyofasi va qonunga cheksiz hurmati bugungi yoshlarga tom maʼnoda oʻrnakdir. Zero, ibratli umrlar hech qachon eʼtibordan chetda qolmaydi, balki ularning qadriyatlari vaqt oʻtgani sayin davlatchilik tarixida chinakam oltin mezonga aylanib boraveradi...

Xolmoʻmin YODGOROV,

Sudyalar oliy kengashi raisi.