Kuchli taʼsir qiluvchi dori vositalari savdosi bilan shugʻullanib kelgan shaxslar ushlandi. Bu haqida Iqtisodiy jinoyatlarga qarshi kurashish departamenti xabar berdi.

Maʼlum qilinishicha, Bosh prokuratura huzuridagi Departamentning Yangiariq tumani boʻlimi va boshqa huquqni muhofaza qiluvchi organ xodimlari hamkorligida tezkor tadbir oʻtkazilgan.

Unda kuchli taʼsir qiluvchi dori vositalari savdosi bilan shugʻullanib kelgan fuqarolar B.B. va M.A. 50 dona “Gabaten” nomli kuchli taʼsir qiluvchi dori vositasini fuqaro S.R.ga sotgan vaqtida ashyoviy dalillar bilan qoʻlga olingan.

Shu kabi yana bir holat, Departamentining Guliston shahri boʻlimi xodimlari tomonidan oʻtkazilgan tezkor tadbirda ham fosh qilingan.

Unga koʻra, fuqarolar U.S. A.G. va A.K. 46 dona “Zardeks” nomli kuchli taʼsir qiluvchi dori vositasini fuqaroga sotgan vaqtida ashyoviy dalillar bilan ushlangan.

Shuningdek, Departamentning Uchtepa tumani boʻlimi va boshqa huquqni muhofaza qiluvchi organ xodimlari hamkorligida oʻtkazilgan tezkor tadbirda esa fuqaro S.A.ning boshqaruvidagi “Onix” rusumli avtotransport vositasi koʻzdan kechirilganda, avtotransport vositasi salonida 930 dona tarkibida kuchli taʼsir qiluvchi moddalari mavjud boʻlgan vositalarni oʻtkazish maqsadida olib kelganligi aniqlanib, ushbu mahsulotlar ashyoviy dalil sifatida rasmiylashtirib olingan.

Hozirda mazkur holatlar yuzasidan Jinoyat kodeksining 251-1-moddasi (giyohvandlik vositalari, ularning analoglari yoki psixotrop moddalar hisoblanmaydigan kuchli taʼsir qiluvchi moddalarni targʻib qiluvchi mahsulotni tayyorlash, tarqatish, reklama qilish, namoyish etish yoki bunday moddalarni yoxud zaharli moddalarni qonunga xilof ravishda muomalaga kiritish) bilan jinoyat ishlari qoʻzgʻatilib, tergov harakatlari oʻtkazilmoqda.