Namangan viloyatining azaldan milliy hunarmandchilik markazlaridan biri sifatida dong taratgan Chust tumani haqida gap ketganda “Chust doʻppisi”, “Chust pichogʻi” degan atamalar ichki bir gʻurur bilan tilga olinadi. Ularni viloyatga tashrif buyurgan har bir mehmonga esdalik sifatida tuhfa qilinishi ham bejiz emas. Qolaversa, Chust zardoʻzligi va yogʻoch oʻymakorligi ham sarhadlar osha maʼlumu mashhur boʻlib bormoqda.

Tumanda barpo etilayotgan Hunarmandlar shaharchasi ana shu boy merosni iqtisodiy drayverga aylantirish, turizmni rivojlantirish va yangi ish oʻrinlari yaratish nuqtayi nazaridan muhim ahamiyat kasb etmoqda. Buyuk Ipak yoʻlining ramziy manzillaridan biri — vodiyni poytaxt bilan bogʻlovchi 4R-112 avtomobil yoʻli boʻyida qariyb 17 gektarga yaqin maydonda qurilayotgan shaharchada milliy hunarmandchilik mahsulotlarini ishlab chiqarish, sotish va namoyish qilish uchun maxsus infratuzilma yaratilmoqda.

Davlatimiz rahbarining 2023-yil 27-iyuldagi “Turizm yoʻnalishidagi islohotlarni yanada jadallashtirish va sohada davlat boshqaruvi tizimini samarali tashkil qilish chora-tadbirlari toʻgʻrisida”gi qarorida belgilangan vazifalar doirasida qurilayotgan “Hunarmandlar shaharchasi” 168 ta lotga ajratilgan boʻlib, shundan 30 tasida hozirda qurilish ishlari jadal ketmoqda. Jarayonga 10 ta ekskovator, 15 ta yuk mashinasi va 200 nafar ishchi jalb qilingan.

—Prezidentimizning milliy qadriyatlarmizni asrab avaylash, rivojlantirishga qaratayotgan alohida eʼtiborlarining ifodasi, viloyat rahbariyatining ezgu tashabbusi sifatida qad rostlayotgan bu majmua chustlik hunarmandlar imkoniyatlarini yanada kengaytiradi, — deydi “Hunarmand” uyushmasi viloyat boʻlimining rahbari Zohidjon Valiyev. –Chunki, shaharcha asrlar davomida shakllangan hunarmandchilik maktablarini oʻzida jamlaydi. Shuningdek, milliy hunarmandchiligimiz anʼanalarini saqlab qolish, rivojlantirish va kelgusi avlodlarga asl holicha yetkazish bilan bir qatorda mahalliy brendni xalqaro bozorga olib chiqishda ham mazkur loyiha katta ahamiyatga ega boʻladi.

Taʼkidlash joizki, mazkur shaharcha uch muhim iqtisodiy vazifani bajarishi bilan ahamiyatli. Yaʼni, avvalo, shaharcha aholi, ayniqsa yoshlar va xotin-qizlar bandligini taʼminlashda katta maydon sifatida xizmat qiladi. Chustda hunarmandchilik bilan shugʻullanuvchi yuzlab oilalar uchun doimiy ish joyi, mahsulot sotish nuqtasi va kooperatsiya tizimi yaratiladi. Keyin, Fargʻona vodiysidagi qadimiy hunarmandchilik markazi sifatida tumanning turizm salohiyatini oshiradi. Shaharcha atrofida tashkil qilinajak milliy oshxonalar, etno-koʻrgazmalar va festivallar mintaqaning yangi turistik brendiga aylanishi mumkin. Qolaversa, jahon bozorida qoʻl mehnati bilan tayyorlangan milliy mahsulotlarga talab ortib borayotgan bugungi kunda milliy hunarmandchilik mahsulotlarining elektron savdo platformalari orqali eksport imkoniyatlari kengayib, hudud iqtisodiyotida qoʻshimcha valyuta olib keladi.

— Hunarmandlar markazidan har biri 4 sotixdan boʻlgan oltita maydonni auksion orqali xarid qildim, — deydi tadbirkor Mahmudjon Boboyev. – Asosiy maqsadimiz sakkiz sotixda uch qavatli savdo majmuasini qurish. Bittasida ishlab chiqarish sexini barpo qilishni rejalashtirganmiz. Bunda qurilish sohasida devorlarni bezashda ishlatiladigan travertin uchun toshni maydalash hisobiga xomashyo tayyorlanadi. Bu yerda oʻn olti kishi ish bilan taʼminlanadi.

— Momolarimizning sanʼat darajasiga koʻtarilgan hunarlarini davom ettirayotganimdan baxtliman, — deydi xali yosh boʻlishiga qaramay Chust doʻppidoʻzligi sanʼati ustasiga aylangan, koʻplab shogirdlarga ega Nilufar Vohidova. – “Hunarmandlar shaharchasi” bizga yangi imkoniyatlarni taqdim qilishiga shubha yoʻq. Ayniqsa, shaharchada doʻppidoʻz ayollar uchun alohida pavilyonlar va savdo nuqtalari tashkil etilishi rejalashtirilgani faoliyatimizni yanada kengaytirish, master-klasslar ham oʻtkazish imkoniyatlarini beradi.

Bugun bunyodkorlik qizgʻin davom etayotgan “Hunarmandlar shaharchasi” qisqa vaqt ichida Namangan viloyatining milliy qadriyatlar, xalq amaliy sanʼati, turizm markazlaridan biriga aylanib, nafaqat mahalliy iqtisodiyot, balki Oʻzbekistonning milliy brendlarini dunyoga tanitishga xizmat qiladi.

Akramjon SATTOROV,

“Xalq soʻzi”