Joriy yilning 4-mart kuni Jahon iqtisodiyoti va diplomatiya universitetida Oliy Majlis Senatining Xalqaro munosabatlar, tashki iqtisodiy aloqalar, xorijiy investitsiyalar va turizm masalalari qoʻmitasi bilan hamkorlikda “Oʻzbekiston va Birlashgan Millatlar Tashkiloti: 34 yillik hamkorlik tajribasi va istiqbollari” mavzusida davra suhbati tashkil etildi.

Unda senatorlar, vazirlik va idoralar, xalqaro tashkilotlar vakillari, fuqarolik jamiyati institutlarining ekspertlari, oliy taʼlim muassasalarining professor-oʻqituvchilari va talabalar hamda ommaviy axborot vositalari xodimlari ishtirok etdi.

Soʻzga chiqqanlar taʼkidlaganidek, Oʻzbekistonning tashqi siyosat faoliyati konsepsiyasi doirasida dunyo davlatlari va xalqaro tashkilotlar bilan ikki va koʻp tomonlama hamkorlik aloqalari yangi bosqichga koʻtarildi.

Ayniqsa, Markaziy Osiyodagi qoʻshni davlatlar bilan ochiq, konstruktiv va oʻzaro ishonchga asoslangan munosabatlar orqali mintaqaviy xavfsizlik hamda barqarorlikni taʼminlashda muhim qadamlar qilinmoqda.

Tadbir ishtirokchilari tomonidan Oʻzbekiston xalqaro darajada tashabbuslarni faol ilgari surayotganligi, mintaqaviy va global masalalarni hal etishda mamlakatimiz nufuzi oshib borayotgani alohida qayd etildi.

Shuningdek, mamlakatimizning BMT doirasidagi tashabbuslari rezolyutsiya sifatida qabul qilinayotgani, xususan, ushbu tashabbuslar Markaziy Osiyoda tinchlik va barqaror taraqqiyotni taʼminlash, iqlim oʻzgarishiga qarshi kurashish hamda Orolboʻyi hududini rivojlantirishga hissa qoʻshayotgani taʼkidlandi.

Davra suhbati yakunida Oʻzbekistonning BMT va boshqa xalqaro tashkilotlar bilan hamkorlik aloqalarini yanada chuqurlashtirish hamda parlament diplomatiyasi imkoniyatlaridan foydalanish boʻyicha taklif va tavsiyalar ishlab chiqildi.