Oliy Majlis Senati Raisi Tanzila Narbayeva boshchiligidagi Oʻzbekiston parlament delegatsiyasi Serbiya Respublikasi Xalq yigʻilishi taklifiga binoan Serbiyada rasmiy tashrif bilan boʻlib turibdi.

Tashrif doirasida Oʻzbekiston delegatsiyasi Belgrad shahrida Parlamentlararo ittifoq Parlamentlar ayol aʼzolari global konferensiyasida ishtirok etdi.

Konferensiya ishida parlament delegatsiyalari, xalqaro tashkilotlar va ekspertlar, 65 davlatdan 400 dan ortiq delegatlar qatnashdi.

Global konferensiyani Parlamentlararo ittifoq Prezidenti Tuliya Ekson ochib berdi hamda mazkur xalqaro anjumanning ahamiyati, ayollarning huquq va manfaatlari himoyasining qanchalik dolzarb ekaniga toʻxtalib oʻtdi.

Taʼkidlanganidek, anjumanning asosiy maqsadi – gender tenglikni taʼminlash, ayollarning siyosiy qarorlar qabul qilishdagi ishtirokini kengaytirish va parlamentda ayollar huquqlarini himoya qilish boʻyicha tajriba almashishdan iborat.

“Tenglikni targʻib qilish: gender stereotiplar va salbiy ijtimoiy normalarni yengib oʻtish” mavzusida tashkil etilgan sessiyada Senat Raisi Tanzila Narbayeva mamlakatimizda gender tenglik sohasida amalga oshirilayotgan islohotlar yuzasidan maʼruza qildi.

Anjumanda taʼkidlanganidek, Oʻzbekistonda gender tenglikni taʼminlash davlat siyosatining ustuvor yoʻnalishlaridan biri sifatida belgilab olingan boʻlib, soʻnggi yillarda bu sohada keng qamrovli huquqiy va institutsional islohotlar amalga oshirilmoqda. Xususan, xotin-qizlarni tazyiq va zoʻravonlikdan himoya qilish, ularning davlat va jamiyat boshqaruvidagi ishtirokini kengaytirish, teng huquq va imkoniyatlarni mustahkamlashga qaratilgan mexanizmlar bosqichma-bosqich takomillashib bormoqda.

Shu bilan birga, ayollarni taʼlim, zamonaviy kasb-hunarlar va yuqori texnologiyalar sohalariga keng jalb etish, ularning iqtisodiy faolligini oshirish hamda xotin-qizlar tadbirkorligini qoʻllab-quvvatlash boʻyicha tizimli ishlar amalga oshirilayotgani qayd etildi.

Mamlakatimizda xotin-qizlarning siyosiy yetakchilik salohiyatini rivojlantirish masalasiga alohida eʼtibor qaratildi, shuningdek, siyosiy partiyalar faoliyatida ularning ishtirokini kengaytirish uchun zarur shart-sharoitlar yaratilgani, rahbarlik lavozimlariga tayyorlashga qaratilgan kadrlar zaxirasi va maxsus dasturlar yoʻlga qoʻyilgani qayd etildi.

Gender stereotiplar va salbiy ijtimoiy qarashlarga barham berish maqsadida mamlakat miqyosida keng koʻlamli axborot-targʻibot ishlari olib borilayotgani, ushbu yoʻnalishdagi dasturlar Gender tenglik boʻyicha milliy komissiya tomonidan muntazam monitoring qilib borilayotgani namunaviy tajriba sifatida eʼtirof etildi.

Anjuman davomida Oʻzbekistonda gender tenglikni taʼminlash va ayollarning davlat hamda jamiyat boshqaruvidagi oʻrnini mustahkamlash borasidagi islohotlar xalqaro hamjamiyat tomonidan eʼtirof etilayotgani qayd etildi. Jumladan, parlamentda ayollar ulushi 38 foizga yetgani, shuningdek, Oʻzbekiston Parlamentlararo ittifoq reytinglarida 92 pogʻonaga koʻtarilib, dunyoda 36-oʻrinni egallagani mamlakatda amalga oshirilayotgan islohotlarning samarasini namoyon etmoqda.

Oʻzbekiston tajribasi gender stereotiplarni yengib oʻtish davlat boshqaruvi sifati va barqaror rivojlanish masalasi ekanini koʻrsatayotgani qayd etildi hamda global miqyosda parlamentlar bir-birlari bilan qonunchilik faoliyati tajribasi va gender stereotiplarga barham berishga qaratilgan samarali qonunchilikni joriy etish mexanizmlari yuzasidan almashishi boʻyicha muhim tashabbuslar ilgari surildi.

Ishtirokchilarga 2026-yil 4–6-sentyabr kunlari Samarqand shahrida Parlamentlararo ittifoq Yosh parlament aʼzolarining global konferensiyasi oʻtkazilishi rejalashtirilgani haqida ham maʼlum qilindi.