Oliy Majlis Senatining Byudjet va iqtisodiy masalalar qoʻmitasining navbatdagi majlisida Oʻzbekiston Respublikasi Markaziy bankining 2025-yildagi faoliyati yuzasidan hisoboti dastlabki tarzda koʻrib chiqildi.

Qayd etilganidek, Markaziy bankning 2025-yildagi faoliyatida asosiy eʼtibor iqtisodiyotda narxlar barqarorligini taʼminlash, inflyatsiya darajasini pasaytirish va uni oʻrta muddatli 5 foizlik maqsadli koʻrsatkichga yaqinlashtirish, pul-kredit siyosati samaradorligini oshirish, shuningdek, moliyaviy barqarorlikni mustahkamlashga qaratilgan.

Hisobot davrida mamlakat iqtisodiyoti barqaror oʻsishni namoyon etib, yalpi ichki mahsulot 7,7 foizga oshgan. Umumiy inflyatsiya pasayib, yil yakunida 7,3 foizni tashkil etgan va 2024-yilga nisbatan 2,5 foizga kamaygan. Bazaviy inflyatsiya ham 5,7 foizgacha sekinlashgan.

2025-yilda Markaziy bankning asosiy stavkasi 14 foiz darajasida belgilanib, yil davomida ushbu darajada saqlab qolingan. Pul bozoridagi operatsiyalar hajmi 783 trln soʻmni tashkil etgan.

Moliyaviy sektorda ijobiy natijalar qayd etilgan. Jumladan, banklar aktivlari 925 trln soʻmga yetgan, iqtisodiyotga kredit qoʻyilmalari 653 trln soʻmni tashkil etgan, ajratilgan kreditlar hajmi 390 trln soʻmga yetgan. Mikro, kichik va oʻrta biznesni qoʻllab-quvvatlash uchun 131 trln soʻm kredit ajratilgan, 3,46 mln kishining bandligi taʼminlangan.

Bank tizimi barqarorligi koʻrsatkichlari yaxshilanib, kapital monandligi 18,3 foizni tashkil etgan va belgilangan minimal talablardan yuqori darajada saqlangan. Muammoli kreditlar ulushi 4 foizdan 3 foizgacha pasaygan.

Valyuta bozorida ijobiy dinamika kuzatilib, milliy valyuta AQSH dollariga nisbatan 6,9 foizga mustahkamlangan. Xalqaro zaxiralar hajmi 66,3 mlrd dollarga yetib, 61 foizga oshgan.

Toʻlov tizimlari va raqamli moliyaviy xizmatlarni rivojlantirish borasida ham sezilarli oʻsish qayd etilgan. Xususan, mobil ilovalar orqali amalga oshirilgan operatsiyalar hajmi 646 trln soʻmni tashkil etib, 1,6 barobarga koʻpaygan.

Majlisda mazkur hisobot senatorlar tomonidan atroflicha muhokama qilinib, inflyatsiya darajasini yanada pasaytirish, pul-kredit siyosati vositalarini takomillashtirish, moliyaviy barqarorlikni mustahkamlash, toʻlov tizimlari xavfsizligini taʼminlash hamda kiberxavfsizlik choralarini kuchaytirish yuzasidan qator taklif va tavsiyalar bildirildi.

Muhokama yakunida Qoʻmita tomonidan tegishli qaror qabul qilindi.