Buxoro, Andijon, Namangan va Surxondaryo viloyatida fuqarolarni Koreyaga yuborish bilan bogʻliq firibgarlik holatlari fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Qayd etilishicha, Departamentning Buxoro viloyati boshqarmasi va boshqa huquqni muhofaza qiluvchi organ xodimlari hamkorligida oʻtkazilgan tezkor tadbirda fuqaro N.J. migratsiya agentligida ishlovchi tanishlari orqali fuqaroni Koreya davlatiga yuborishini aytib, 7 ming dollar olgan vaqtida ashyoviy dalillar bilan ushlangan.

Departamentning Andijon viloyati boshqarmasi va boshqa huquqni muhofaza qiluvchi organ xodimlari hamkorligida oʻtkazilgan tezkor tadbirda “N.K.” nodavlat taʼlim muassasasi rahbari S.E. goʻyoki yuqori lavozimlarda ishlovchi tanishlari orqali 6 ming dollar va 3 mln soʻm evaziga fuqaro O.A.ga xorijiy davlatlarning bakalavr darajadagi diplomini olib berishi va Koreya davlatiga ketishi uchun ishchi viza olib berishini aytib, ushbu pullar hisobidan 500 dollar va 3 mln soʻmni olgan vaqtida ashyoviy dalillar bilan ushlangan.

Tergovga qadar tekshiruvda S.E. yana 14 nafar fuqaroni ham Koreya davlatiga ketishlari uchun ishchi viza olib berishi evaziga firibgarlik yoʻli bilan 44,1 ming dollarni qoʻlga kiritgani aniqlangan.

Departamentning Namangan viloyati boshqarmasi xodimlari tomonidan oʻtkazilgan tezkor tadbirda “G.V.” MCHJ rahbari A.V. 2 nafar fuqaroni Koreya davlatidagi oliy oʻquv yurtining magistratura bosqichiga oʻqishga va ishga kiritishini aytib, 11 ming dollarini olgan vaqtida ashyoviy dalillar bilan ushlangan.

Departamentning Surxondaryo viloyati boshqarmasi va boshqa huquqni muhofaza qiluvchi organ xodimlari hamkorligida oʻtkazilgan tezkor tadbirda fuqaro F.R. fuqaro A.Q.ni 10 ming dollar evaziga Koreya davlatiga ishga yuborishini aytib, ushbu pullar hisobidan 5 ming dollar va 61 mln soʻmni firibgarlik yoʻli bilan olgan vaqtida ashyoviy dalillar bilan ushlangan.

Bildirilishicha, hozirda mazkur holatlar yuzasidan Jinoyat kodeksining 25, 168-moddasi (firibgarlik) va 28, 211-moddasi (pora berish) bilan jinoyat ishlari qoʻzgʻatilib, tergov harakatlari oʻtkazilmoqda.