Xabaringiz bor, “Poytaxt” biznes majmuasi, sobiq “Gazetalar ishlab chiqarish majmuasi” binosi, “Maʼmuriy bino” (Sobiq Respublika birjasi markazi), “Malika” savdo-maishiy xizmat koʻrsatish majmuasi, “Ichan-Qala” mehmonxona majmuasi, “Beldirsoy” dam olish maskani, “Qizil suv sporti sogʻlomlashtirish maskani” MCHJ, “Sijjak” dam olish maskanlari davlat mulki boʻlgan obyektlarini sotuvga qoʻyilgan.

Davlat aktivlarini boshqarish agentligi ushbu bilan yaqindan tanishtirish maqsadida jurnalistlar uchun press tur tashkil etilgan edi.

Press tur Boʻstonliq mintaqasining Beldirsoy traktida joylashgan “Beldirsoy” oromgohi changʻi majmuasidan boshlandi. Majmuaning jihozlari eskirgan, biroq u joylashgan tabiat nihoyatda goʻzal.

Obyekt dengiz sathidan 1700 metr balandlikda joylashgan, quyosh charaqlab turishiga qaramay havo salqin.

“Oʻzbekistonda keng koʻlamli xususiylashtirish ishlari olib borilmoqda. Xususan, «Beldirsoy” dam olish maskani, “Qizil suv sporti sogʻlomlashtirish maskani” MCHJ, “Sijjak” dam olish maskanlari davlat tasarrufida. Ulardan tezroq samarali foydalanish kerak. Agar tadbirkorlar ularni olib xususiylashtirib, Yangi ruh, yangi nafas kiritib, rivojlantirsa, yangi ish oʻrinlari yaratiladi. 

Xabaringiz bor, bugun Oʻzbekistonda turizmga katta eʼtibor berilmoqda. Boʻstonliq tumani turizmga ixtisoslashgan. Buning tegishli hujjatlari bor. Biz oʻylaymizki, shuni investorlar tezroq sotib olsa turizmga yana-da hissa qoʻshgan boʻlardi», deydi agentlik Matbuot kotibi Ibodov Moʻmin.

Maʼlumotga koʻra, ushbu majmuaning umumiy yer maydoni 46,1 gektarni, bino va inshootlarning umumiy maydoni 9 628,0 kvadrat metrni tashkil etadi. “Beldirsoy” majmuasi bir vaqtning oʻzida 200 dan ortiq odamni qabul qilishi mumkin. Majmua hududida 19 ta kottej, 38 xonali mehmonxona, 80 oʻrinli ikkita restoran, 3 ta bar, yozgi va qishki basseynlar, 2 ta konferens-zal mavjud.

Birinchi tibbiy yordam shoxobchasi, badminton korti, Paint Ball, 2 ta tennis korti. “Beldirsoy” majmuasi 4 ta faslda ham ishlaydi.

Press tur davomida ushbu obyektni sotib olgach undan boshqa maqsadlarda foydalanish mumkin degan savollar yuzaga keldi.

Mutaxassislarning aytishicha, tegishli hujjatlarga asosan bu yerdan faqatgina turizm rivojida foydalanish mumkin. 

“Obyektdan ishlab chiqarish maqsadida foydalanish oʻzini oqlamaydi va tegishli hujjatlarga koʻra bunga yoʻl qoʻyilmaydi”, deydi agentlikning Toshkent viloyati hududiy boshqarmasi boʻlim boshligʻi Otabek Ortiqboyev.

“Beldirsoy” majmuasiga yaqin joyda taniqli “Kumbel” changʻi yoʻlagi mavjud. Eslatib oʻtamiz, Britaniyaning Observer nashri Beldirsoy togʻ-changʻi kurortini dunyodagi ekstremal changʻi va heli-changʻi uchun eng yaxshi joylar roʻyxatiga kiritgan. Keng changʻi maydonlariga ega boʻlgan yoʻl eng qiyin yoʻllardan biridir.

Shaxnoza TOʻRAMURODOVA,

“Xalq soʻzi”