Ўтказилган тезкор тадбир натижасида қарийб 13 кг «опий» гиёҳвандлик воситасининг ноқонуний айланмасига чек қўйилди, деб хабар бермоқда Давлат хавфсизлик хизмати.

Қайд этилишича, Бухоро шаҳрида яшовчи, 1993 йилда туғилган, муқаддам наркожиноят содир этганлиги учун судланган шахс бошқарувидаги «Lacetti» русумли автомашина «Сурхондарё-Бухоро» йўналишида ҳаракатланаётган вақтида Когон тумани ҳудудида тўхтатилган.

Автомашина холислар иштирокида кўздан кечирилганда, унинг мотор қисмидаги ҳаво фильтри остига яшириб қўйилган 993 гр «опий» моддаси процессуал тартибда расмийлаштириб олинган.

Суриштирувлар давомида, у наркотик моддани Термиз туманида истиқомат қилувчи, 1980 йилда туғилган, халқаро юк ташиш фаолияти билан шуғулланувчи шахсдан олганлиги аниқланиб, тезкор тадбир давом эттирилган.

Натижада, ушбу шахс ҳам ушланиб, унинг ёнидан муқаддам Афғонистондан контрабанда қилинган 5 кг ва яшаш хонадонидан эса 7 кг «опий» гиёҳвандлик воситаси ашёвий далил сифатида олинган.

Маълум қилинишича, ҳозирда мазкур шахсларга нисбатан жиноят иши қўзғатилиб, тергов ҳаракатлари олиб борилмоқда.