Тошкент шаҳрида «Yutong» русумли автобус ва BYD русумли енгил автомобиль иштирокида йўл-транспорт ҳодисаси содир бўлди. Бу ҳақда «Тошшаҳартрансхизмат» АЖ ахборот хизмати хабар берди.

Маълум қилинишича, ҳодиса бугун, 2 июнь куни соат 15:28 атрофида Миробод туманидаги Нукус ва Тарас Шевченко кўчалари кесишмасида юз берган.

«Yutong» русумли, 16-сонли йўналиш автобуси ҳайдовчиси Тарас Шевченко кўчасига қайрилаётган вақтида, қарама-қарши йўналишда келаётган BYD русумли автомобиль ҳайдовчиси чорраҳада светофорнинг тақиқловчи чироғига бўйсунмасдан ҳаракатни давом эттирган. Оқибатда иккала транспорт воситаси тўқнашиб, йўл-транспорт ҳодисаси содир этган.

Дастлабки маълумотларга кўра, ҳодиса оқибатида жабрланган ҳайдовчилар тез тиббий ёрдам ходимлари ҳамроҳлигида Республика 1-сонли клиник шифохонасига юборилган.

Ҳозирда мазкур ЙТҲ Тошкент шаҳар ИИББ ЙҲХБ масъул ходимлари томонидан белгиланган тартибда расмийлаштирилган.