Ҳўрмуз бўғозини миналардан тозалаш олти ойга чўзилиши мумкин. Бу ҳақда АҚШ Конгрессида бўлиб ўтган махфий брифингда Пентагон вакиллари маълум қилди, деб ёзади The Washington Post.

WP нашрининг ёзишича, Эрон бўғоз ва унинг атрофига 20 дан ортиқ мина ўрнатган бўлиши мумкин. Уларнинг бир қисми GPS технологиялари ёрдамида масофадан туриб белгиланган нуқталарга йўналтирилган, бир қисми эса, тахминларга кўра, кичик қайиқлар ёрдамида ўрнатилган.

Брифингда Эронга қарши ҳарбий операция якунланмагунча, бўғозни миналардан тозалашни бошлаш даргумон экани айтилди.

Демократлар ҳам, республикачилар ҳам айтилган муддатлардан ҳафсаласи пир бўлди. Бу ҳисобот ёқилғи нархининг юқорилиги узоқ вақт давомида сақланиб қолишини англатади.

Аввалроқ The New York Times нашри Эрон ўз акваториясига ўрнатилган миналарни аниқлаш ва зарарсизлантиришдаги қийинчиликлар туфайли Ҳўрмуз бўғозини тўлиқ оча олмаётгани ҳақида хабар берган эди.