“Халқ сўзи” саҳифасида “Мундиал сари” рукни давом этади. Бугунги сонимизда “B” гуруҳи вакили Қатар терма жамоаси ҳақидаги маълумотлар билан танишамиз.

Умумий маълумотлар

Қатар футбол ассоциацияси 1960 йилда ташкил этилган. Ушбу мамлакат 1970 йилдан бери ФИФАнинг аъзоси ҳисобланади. Шунингдек, мамлакат 1971 йилда Осиё Футбол Конфедерациясига, яъни ОФКнинг расмий аъзосига айланган.

Қатар миллий терма жамоаси тарихдаги дастлабки ўйинини 1970 йилнинг 27 март санасида Баҳрайн терма жамоасига қарши ўтказган ва мазкур баҳсда 2:1 ҳисобида мағлубиятга учраган. Қатар термаси тарихдаги энг йирик ғалабасини Бутан термаси устидан қўлга киритган. 2015 йил Доха шаҳрида бўлиб ўтган мазкур баҳсда Қатар 15:0 ҳисобида ғалаба қозонган.

Қатар миллий терма жамоаси футбол бўйича Жаҳон чемпионатларида жами 1 марта иштирок этган. Жамоанинг мундиалдаги дастлабки ва охирги иштироки ҳам 2022 йилда кузатилган бўлиб, ўшанда жамоа мусобақадаги иштирокини гуруҳ босқичида якунлаган. Қатарнинг Жаҳон чемпионатларидаги энг яхши натижаси ҳам айнан гуруҳ босқичи ҳисобланади.

Жаҳон чемпионати сари босиб ўтган йўли

Осиёда Жаҳон чемпионати саралаши 4 та асосий босқичдан иборат экани кўпчиликка маълум. Қатар терма жамоаси саралашдаги иштирокини 2-босқичдан бошлади.

Жамоа 2-босқичда “A” гуруҳидан ўрин олди. Гуруҳда Қатардан ташқари Ҳиндистон, Қувайт ва Афғонистон терма жамоалари бор эди. Якунда Қатар 6 та ўйиндан 5 тасида ғалаба қозониб, 1 тасида дуранг ўйнаган ҳолда 16 очко билан биринчи ўринни эгаллаб, 3-босқичга йўл олди.

Ушбу босқичда ҳам Акрам Афиф бошчилигидаги жамоа “A” гуруҳидан ўрин олди. Гуруҳда Қатардан ташқари Эрон, Ўзбекистон, Бирлашган Араб Амирликлари, Қирғиз Республикаси ва Корея Халқ Демократик Республикаси терма жамоалари ҳам бор эди.

Қатар жамоаси учун ушбу босқич омадли ўтмади. Ҳатто жамоа Эрон ва Ўзбекистон терма жамоаларини ўз майдонида мағлуб этган бўлса-да, мундиал масаласини ҳал эта олмади. БААга ҳар икки ўйинда ютқазган, КХДР билан дуранг ўйнаган ва Қирғиз Республикасига мағлуб бўлган жамоа бу босқични 13 очко билан тўртинчи ўринда якунлади ва йўлланма учун 4-босқичда курашни давом эттирди.

Ушбу босқичда жамоа Бирлашган Араб Амирликлари ва Ўмон Султонлиги билан бир гуруҳдан ўрин олди. Дастлабки баҳсда Ўмон билан 0:0 ҳисобида дуранг ўйнади, иккинчи ўйинда эса БААни 2:1 ҳисобида мағлуб этди. Шу тариқа жамоа плей-офф орқали мундиал йўлланмасини қўлга киритди.

Сўнгги ўйинлардаги натижалар

Қатар терма жамоаси 2025 йилда 11 та ўйин ўтказди. 2026 йил март ойида ўтказилиши керак бўлган ўйинлар Форс кўрфазидаги вазият сабаб қолдирилди. 2025 йилдаги ўйинлардан атиги 2 таси ғалаба билан якунланди. 3 та ўйинда дуранг, 6 тасида эса мағлубият қайд этилди.

Жамоа охирги ўйинларида Ўзбекистон, Эрон ва Тунисга мағлуб бўлиш билан бирга, БАА ва Эрон терма жамоаларини мағлуб этишни ҳам уддалаган.

Бош мураббий

Айни вақтда Қатар терма жамоасини испаниялик мутахассис Юлен Лопетеги бошқармоқда. 59 ёшли мураббий жамоани 2025 йил май ойидан бери бошқариб келмоқда.

Лопетеги бунга қадар Испаниянинг турли ёшдаги терма жамоалари, шунингдек, “Реал Мадрид”, “Райо Вальекано”, “Севилья”, “Порту”, “Вест Ҳэм” ва “Вулверҳэмптон” каби клубларда бош мураббий сифатида фаолият юритган.

У мураббий сифатида Испания U-19 ва U-21 жамоалари билан Европа чемпионатларида ғолиб бўлган. Шунингдек, 2020 йил “Севилья” билан Европа Лигасида ғалаба қозонган.

Футболчилар

Айни вақтда Қатарнинг энг машҳур футболчилари ҳақида гап кетганда қуйидагиларни тилга олиш мумкин:

Акрам Афиф — (“Ал-Садд”);

Алмоэз Али — (“Ал-Дуҳайл”);

Эдмилсон Жуниор — (“Ал-Дуҳайл”);

Гильерме — (“Ал-Садд”).

Жаҳон чемпионатидаги ўйинлари ва учрашувлар санаси

Қатар миллий терма жамоаси Жаҳон чемпионати мезбони сифатида турнирнинг “B” гуруҳидан ўрин олди. Гуруҳда ушбу мамлакатдан ташқари Канада, Швейцария ва Босния ва Герцеговина терма жамоалари ҳам иштирок этади.

Ушбу рақибларга қарши баҳслар қуйидаги саналарда бўлиб ўтади:

Қатар — Швейцария (14 июнь);

Қатар — Канада (19 июнь);

Босния ва Герцеговина — Қатар (25 июнь).

Жамоанинг мундиалдаги имкониятлари

Кўпчилик Қатар терма жамоасига “B” гуруҳининг аутсайдери сифатида қарамоқда. Бунга етарлича асослар мавжуд.

Жамоа футболчиларининг асосий қисми маҳаллий чемпионатда тўп суриши уларда халқаро тажриба етарли эмаслигини кўрсатади. Қолаверса, жамоанинг кўплаб етакчиларининг ёши 30 дан ошган бўлиб, бу эса жисмоний ҳолат билан боғлиқ муаммоларни келтириб чиқариши мумкин.

Шунингдек, сўнгги йилларда Қатардан юқори савиядаги ёш футболчилар кам чиқмоқда. Бу ҳолат терма жамоа натижаларида ҳам яққол сезилмоқда.

Шулардан келиб чиқиб, Қатарни гуруҳ аутсайдери деб аташ мумкин. Жамоа учун гуруҳдан чиқиш асосий ва энг қийин вазифалардан бири бўлиб қолмоқда.