Американинг Apple корпорацияси бош директори Тим Кук 2026 йилнинг кузида ўз лавозимини тарк этади, дейилади компания сайтида.

Ушбу лавозимда уни компаниянинг аппарат таъминоти бўйича раҳбари Жон Тернус алмаштиради.

«Apple Тим Кук компания директорлар кенгашининг ижрочи раиси бўлишини, аппарат таъминотини ишлаб чиқиш бўлими катта вице-президенти Жон Тернус эса 2026 йил 1 сентябрдан кейинги бош директор бўлишини эълон қилди. Директорлар кенгаши томонидан бир овоздан қўллаб-қувватланган ушбу ўзгариш узоқ муддатли ворисликни режалаштириш жараёнининг натижасидир», — дейилади баёнотда.

Тим Кук компанияга 1998 йилда келиб қўшилган ва 2011 йилда ижрочи директор лавозимини эгаллаган эди.

Жон Тернус эса Appleʼдаги фаолиятини 2001 йилда бошлаган, 2013 йилда аппарат таъминоти бўйича вице-президент этиб тайинланган.