Термиз шаҳрида мамлакатимиз ҳудудларида ташкил этилаётган илк «Ягона миграция маркази»нинг тантанали очилиш маросими бўлиб ўтди.

Тадбирда Сурхондарё вилояти ҳокими Улуғбек Қосимов, Миграция агентлиги директори Беҳзод Мусаев, соҳа мутасаддилари, нуронийлар ҳамда ёшлар иштирок этди.

Замонавий талаблар асосида ташкил этилган мазкур марказ хорижда меҳнат фаолиятини амалга ошириш истагида бўлган фуқароларга зарур хизматларни бир жойнинг ўзида кўрсатиш имконини беради.

Марказда меҳнат бозорида талаб юқори бўлган касблар бўйича ўқув курслари ташкил этилган. Шунингдек, фуқаролар хорижий тилларни ўрганиш, халқаро сертификатлар учун имтиҳон топшириш, ҳужжатларни расмийлаштириш ва виза масалалари бўйича амалий ёрдам олиш имкониятига эга. Бепул консалтинг хизматлари ҳам йўлга қўйилган.

Марказ инфратузилмаси 100 ўринли ўқув хоналари, 18 ўринли музокаралар зали, 50 ўринли танловлар хоналари ҳамда бир вақтнинг ўзида ўн нафардан ортиқ фуқарога хизмат кўрсатиш имкониятига эга фронт-офисни ўз ичига олади.

Янги марказ аҳолининг меҳнат бозоридаги рақобатбардошлигини ошириш, хавфсиз ва тартибли меҳнат миграциясини таъминлаш, фуқароларнинг вақт ва маблағ сарфини қисқартиришга хизмат қилади. Шу жиҳатдан у меҳнат миграцияси соҳасидаги хизматларни янада қулай ва самарали ташкил этишда муҳим аҳамият касб этади.

Фарҳод ЭСОНОВ, «Халқ сўзи».