Жорий йилнинг 22 апрель куни Олий Мажлис ҳузуридаги Фуқаролик жамияти институтларини қўллаб-қувватлаш жамоат фонди маблағларини бошқариш бўйича Парламент комиссияси аъзолари ҳамда фуқаролик жамияти институтлари вакиллари ўртасида учрашув бўлиб ўтди.

Учрашувдан кўзланган асосий мақсад – фуқаролик жамияти институтларининг парламент билан ўзаро ҳамкорлигини мустаҳкамлаш, парламент фаолиятига оид билимларни ошириш ҳамда жамият ҳаётидаги ижтимоий аҳамиятга эга ташаббусларни биргаликда илгари суришдан иборат бўлди.

Тадбир давомида иштирокчиларга Олий Мажлис Сенатининг конституциявий ваколатлари, қонунчилик жараёнидаги ўрни, парламент назорати ва парламент дипломатияси, шунингдек, давлат бошқаруви тизимида юқори палатанинг роли ҳақида батафсил маълумот берилди.

Жумладан, ёшларнинг ижтимоий-сиёсий ҳаётдаги фаоллигини ошириш ва уларни қонун ижодкорлиги жараёнларига кенг жалб этиш масалаларига алоҳида эътибор қаратилди.

Шунингдек, иштирокчилар Сенат девони ва қўмиталарининг фаолияти ҳамда парламент иш жараёнлари билан яқиндан танишдилар.