Мактабгача ва мактаб таълими вазири Эъзоза Каримова Чирчиқ давлат педагогика университетига ташриф буюриб, талаба-ёшлар билан очиқ мулоқот ўтказди.

Учрашув давомида вазир талабаларнинг фикр-мулоҳазаларини тинглаб, соҳада амалга оширилаётган ислоҳотлар юзасидан ўз тавсиялари билан ўртоқлашди. Шунингдек, иштирокчиларнинг соҳа ривожига оид саволларига батафсил жавоб берилди. Тадбир якунида бир гуруҳ фаол ва иқтидорли талабалар вазирликнинг пул мукофотлари ҳамда қимматбаҳо совғалари билан тақдирланди.

Ташриф доирасида Эъзоза Каримова университетда ташкил этилган бир қатор ўзига хос лойиҳалар фаолияти билан яқиндан танишди:

«HAPPYLAB» — мактабгача таълимнинг модулли тизими;

«Кросс-сектор» — талабаларнинг ижтимоий ташаббуслари маркази;

«ЭКО лаборатория» — очиқ осмон остидаги табиатшунослик майдони.

Вазир, шунингдек, «Мактабгача ва бошланғич таълим» факультетида талабалар учун яратилган замонавий шарт-шароитларни кўздан кечирди. Хусусан, «Келажак ўқитувчиси» концепцияси асосида шакллантирилган инновацион таълим муҳити ва дарс жараёнларини ташкил этиш услублари вазирнинг алоҳида эътиборида бўлди.