Ижтимоий тармоқларда айрим шахслар томонидан Сув хўжалиги объектлари хавфсизлигини ва сувдан фойдаланишни назорат қилиш инспекцияси бошлиғи Рустам Рахимов номидан фойдаланилган ҳолда сохта аккаунтлар очилиб, фуқароларга ёлғон мазмундаги мурожаатлар юборилаётгани аниқланмоқда.

Сув хўжалиги вазирлиги мазкур ҳолат юзасидан муносабат билдирди. Унда айтилишича, ушбу сохта аккаунтларда Рустам Рахимовнинг расми, исми ва фамилияси ноқонуний равишда қўлланилмоқда.

Вазирлик фуқаролардан шу каби хабарлар келган тақдирда уни юборган сохта аккаунт билан мулоқотга киришмаслик, юборилган шубҳали ҳаволаларни очмаслик, зарарли (APK) иловаларни телефонга юклаб олмаслик ва ўрнатмаслик ҳамда бундай аккаунтларни дарҳол блоклаш сўраган.

Сув хўжалиги объектлари хавфсизлигини ва сувдан фойдаланишни назорат қилиш инспекцияси раҳбар номидан ёзишмалар олиб бораётган барча аккаунтлар сохта экани, ушбу аккаунтлар фирибгар шахсларга тегишлилигини таъкидлаган.

Шунингдек, инспекция ёки тизимдаги мансабдор шахслар фуқароларга шахсий тартибда хабар юбормаслиги қўшимча қилинган.

«Расмий саҳифа ёки алоқа каналлари очилган тақдирда, бу ҳақда фақат инспекциянинг расмий ахборот ресурслари орқали олдиндан эълон қилинади. Шахсий маълумотларингизни бегоналарга берманг ҳамда шубҳали аккаунтлар ва хабарлар ҳақида тегишли ҳуқуқни муҳофаза қилувчи органларга зудлик билан хабар беринг», — дейилади огоҳлантириш хабарида.